Read Nova_Vulgata Isaias 10 Bible Online

Isaias 10 - Nova_Vulgata bible

Isaias 10

¹Vae, qui condunt leges iniquas et scribentes iniustitiam scribunt,

²ut opprimant in iudicio pauperes et vim faciant causae humilium populi mei, ut fiant viduae praeda eorum, et pupillos diripiant!

³Quid facietis in die visitationis et calamitatis de longe venientis? Ad cuius confugietis auxilium et ubi derelinquetis gloriam vestram?

⁴Nam incurvabimini subter captivos et infra occisos cadetis. In omnibus his non est aversus furor eius, sed adhuc manus eius extenta.

⁵Vae Assur, virga furoris mei et baculus in manu mea, indignatio mea!

⁶Ad gentem impiam mitto eum et contra populum furoris mei mando illi, ut auferat spolia et diripiat praedam et ponat illum in conculcationem quasi lutum platearum.

⁷Ipse autem non sic arbitratur, et cor eius non ita existimat; sed in corde suo ad conterendum et ad internecionem gentium non paucarum.

⁸Dicet enim: “ Numquid non principes mei omnes reges sunt?

⁹Numquid non ut Charcamis sic Chalano? Numquid non ut Arphad sic Emath? Numquid non ut Damascus sic Samaria?

¹⁰Quomodo apprehendit manus mea regna idololatra, quorum simulacra plura sunt quam in Ierusalem et in Samaria,

¹¹numquid non sicut feci Samariae et idolis eius, sic faciam Ierusalem et simulacris eius? ”.

¹²Et erit: cum impleverit Dominus cuncta opera sua in monte Sion et in Ierusalem, visitabo super fructum superbiae cordis regis Assyriae et super arrogantiam altitudinis oculorum eius.

¹³Dixit enim: “ In fortitudine manus meae feci et in sapientia mea, prudens sum enim; et abstuli terminos populorum et scrinia eorum depraedatus sum et detraxi quasi potens in sublimi sedentes;

¹⁴et apprehendit quasi nidum manus mea fortitudinem populorum; et sicut colliguntur ova derelicta, sic universam terram ego congregavi, et non fuit qui moveret pennam aut aperiret os et ganniret ”.

¹⁵Numquid gloriabitur securis contra eum, qui secat in ea? Aut exaltabitur serra contra eum, qui trahit eam? Quomodo si agitet virga elevantem eam, et exaltet baculus eum, qui non est lignum.

¹⁶Propter hoc mittet Dominator, Dominus exercituum, in pingues eius tenuitatem; et subtus gloriam eius ardor ardebit quasi combustio ignis.

¹⁷Et erit Lumen Israel ignis, et Sanctus eius flamma; et succendetur et devorabit spinas eius et vepres in die una.

¹⁸Et gloriam saltus eius et horti eius ab anima usque ad carnem consumet, et erit sicut aeger tabescens;

¹⁹et reliquiae ligni saltus eius tam paucae erunt, ut puer scribat ea.

²⁰Et erit in die illa: non adiciet residuum Israel et, qui effugerint de domo Iacob, inniti super eo, qui percutit eos, sed innitentur super Dominum, Sanctum Israel, in veritate.

²¹Reliquiae revertentur, reliquiae, inquam, Iacob, ad Deum fortem.

²²Si enim fuerit populus tuus, Israel, quasi arena maris, reliquiae revertentur ex eo; consummatio decreta redundat in iustitia:

²³interitum enim, qui decretus est, Dominus, Deus exercituum, faciet in medio omnis terrae.

²⁴Propter hoc haec dicit Dominus, Deus exercituum: “ Noli timere, populus meus habitator Sion, ab Assur; in virga percutiet te et baculum suum levabit super te sicut Aegyptus.

²⁵Adhuc enim paululum modicumque, et consummabitur indignatio et furor meus ad destructionem eorum ”.

²⁶Et suscitabit super eum Dominus exercituum flagellum iuxta plagam Madian in Petra Oreb et virgam suam super mare et levabit eam sicut in Aegypto.

²⁷Et erit in die illa: auferetur onus eius de umero tuo, et iugum eius de collo tuo. Et vastator ascendit a Remmon.

²⁸Veniet in Aiath, transibit per Magron, apud Machmas deponit sarcinas suas;

²⁹transeunt vadum cursim; in Geba pernoctabimus; trepidat Rama, Gabaa Saulis fugit.

³⁰Hinni voce tua, Bathgallim; attende, Laisa; responde, Anathoth.

³¹Migrat Medemena, habitatores Gabim fugiunt;

³²hodie in Nob stabit: agitabit manum suam ad montem filiae Sion, collem Ierusalem.

³³Ecce Dominator, Dominus exercituum, amputat ramos in terrore, et extrema acumina succiduntur, et sublimes humiliantur;

³⁴et caeduntur condensa saltus ferro, et Libanus cum excelsis suis cadet.