Read Nova_Vulgata Isaias 24 Bible Online

Isaias 24 - Nova_Vulgata bible

Isaias 24

¹Ecce Dominus dissipat terram et frangit eam et conturbat faciem eius et dispergit habitatores eius.

²Et erit sicut populus sic sacerdos, et sicut servus sic dominus eius, sicut ancilla sic domina eius, sicut emens sic ille qui vendit, sicut fenerator sic is qui mutuum accipit, sicut qui repetit sic qui debet.

³Dissipatione dissipabitur terra et direptione praedabitur: Dominus enim locutus est verbum hoc.

⁴Luget, languet terra, marcescit, languet orbis, marcescit altitudo simul cum terra.

⁵Et terra infecta est sub habitatoribus suis, quia transgressi sunt leges, violaverunt mandatum, dissipaverunt foedus sempiternum.

⁶Propter hoc maledictio voravit terram, et poenas exsolverunt habitatores eius; ideoque imminuti sunt cultores eius, et relicti sunt homines pauci.

⁷Luget mustum, emarcuit vitis, ingemiscunt omnes, qui laetabantur corde.

⁸Cessavit gaudium tympanorum, quievit sonitus laetantium, cessavit gaudium citharae;

⁹cum cantico non bibent vinum, amara erit potio bibentibus illam.

¹⁰Attrita est civitas inanitatis, clausa est omnis domus, ut nemo introeat;

¹¹clamor est super vino in plateis, occidit omnis laetitia, translatum est gaudium terrae.

¹²Relicta est in urbe solitudo, et in ruinam confracta est porta;

¹³quia haec erunt in medio terrae, in medio populorum, quomodo si olivae excutiantur, et finita vindemia colligantur racemi.

¹⁴Hi levabunt vocem suam, laudabunt maiestatem Domini, hinnient de mari.

¹⁵Propter hoc in regionibus lucis glorificate Dominum, in insulis maris nomen Domini, Dei Israel.

¹⁶A finibus terrae laudes audivimus: “ Gloria iusto ”. Et dixi: “ Secretum meum mihi, secretum meum mihi. Vae mihi! ”. Praevaricantes praevaricati sunt et praevaricatione praevaricantium praevaricati sunt.

¹⁷Formido et fovea et laqueus super te, habitator terrae.

¹⁸Et erit: qui fugerit a voce formidinis, cadet in foveam; et, qui ascenderit de fovea, tenebitur laqueo, quia cataractae de excelsis apertae sunt, et concussa sunt fundamenta terrae.

¹⁹Confractione confracta est terra, contritione contrita est terra, commotione commota est terra,

²⁰agitatione agitabitur terra sicut ebrius et fluctuabit quasi tabernaculum; et gravis erit super eam iniquitas eius, et corruet et non adiciet ut resurgat.

²¹Et erit in die illa: visitabit Dominus super militiam caeli in excelso et super reges terrae super terram;

²²et congregabuntur et vincientur in lacu et claudentur in carcere; et post multos dies visitabuntur.

²³Et erubescet luna, et confundetur sol, quia regnavit Dominus exercituum in monte Sion et in Ierusalem et in conspectu senum suorum glorificabitur.