Read Nova_Vulgata Isaias 3 Bible Online

Isaias 3 - Nova_Vulgata bible

Isaias 3

¹Ecce enim Dominator, Dominus exercituum, aufert a Ierusalem et a Iuda robur et praesidium, omne robur panis et omne robur aquae,

²fortem et virum bellatorem, iudicem et prophetam et hariolum et senem,

³principem super quinquaginta et honorabilem vultu et consiliarium et sapientem magum et prudentem incantatorem.

⁴Et dabo pueros principes eorum; et infantes dominabuntur eis.

⁵Et irruet populus, vir ad virum, unusquisque ad proximum suum: tumultuabitur puer contra senem, et ignobilis contra nobilem.

⁶Apprehendet enim vir fratrem suum in domo patris sui: “ Vestimentum tibi est, princeps esto noster, ruina autem haec sub manu tua ”.

⁷Clamabit in die illa dicens: “ Non sum medicus, et in domo mea non est panis neque vestimentum; nolite constituere me principem populi ”.

⁸Ruit enim Ierusalem, et Iudas concidit, quia lingua eorum et adinventiones eorum contra Dominum, ut provocarent oculos maiestatis eius.

⁹Procacitas vultus eorum accusat eos, et peccatum suum quasi Sodoma praedicaverunt nec absconderunt; vae animae eorum, quoniam reddita sunt eis mala!

¹⁰Dicite iusto: “ Bene! ”, quoniam fructum adinventionum suarum comedet.

¹¹Vae impio in malum: retributio enim manuum eius fiet ei!

¹²Populum meum opprimit infans, et mulieres dominantur ei. Popule meus, qui te beatum dicunt, ipsi te decipiunt et viam gressuum tuorum dissipant.

¹³Surgit ad arguendum Dominus et stat ad iudicandos populos.

¹⁴Dominus ad iudicium veniet cum senibus populi sui et principibus eius: “ Vos enim depasti estis vineam, et rapina pauperis in domibus vestris.

¹⁵Quare atteritis populum meum et facies pauperum commolitis? ”, dicit Dominus, Deus exercituum.

¹⁶Et dixit Dominus: “ Pro eo quod elevatae sunt filiae Sion et ambulaverunt extento collo et nutibus oculorum, parvis passibus incedebant et catenulis pedum tinniebant,

¹⁷decalvabit Dominus verticem filiarum Sion et Dominus crinem earum nudabit ”.

¹⁸In die illa auferet Dominus ornamentum calceamentorum et torques

¹⁹et lunulas et inaures et armillas et mitras,

²⁰discriminalia et periscelidas et fascias et olfactoriola

²¹et anulos et ornamenta narium,

²²mutatoria et palliola et linteamina et marsupia,

²³specula et sindones et vittas et pallia.

²⁴Et erit pro suavi odore foetor, et pro zona funiculus, et pro crispante crine calvitium, et pro fascia pectorali cilicium, stigma pro pulchritudine.

²⁵Viri tui gladio cadent, et fortes tui in proelio,

²⁶et maerebunt atque lugebunt portae eius, et desolata in terra sedebit.