Read Nova_Vulgata Isaias 45 Bible Online

Isaias 45 - Nova_Vulgata bible

Isaias 45

¹Haec dicit Dominus de uncto suo Cyro: “ Apprehendi dexteram eius, ut subiciam ante faciem eius gentes et dorsa regum vertam et aperiam coram eo ianuas; et portae non claudentur.

²Ego ante te ibo et montes humiliabo; portas aereas conteram et vectes ferreos confringam.

³Et dabo tibi thesauros absconditos et divitias occultas, ut scias quia ego Dominus, qui vocavi te nomine tuo, Deus Israel.

⁴Propter servum meum Iacob et Israel electum meum, et vocavi te nomine tuo; designavi te, et non cognovisti me.

⁵Ego Dominus, et non est amplius: extra me non est Deus. Accinxi te, et non cognovisti me,

⁶ut sciant ab ortu solis et ab occidente quoniam absque me nullus est. Ego Dominus, et non est alter,

⁷formans lucem et creans tenebras, faciens pacem et creans malum: ego Dominus faciens omnia haec.

⁸Rorate, caeli, desuper, et nubes pluant iustitiam; aperiatur terra et germinet salvationem; et iustitia oriatur simul: ego Dominus creavi eam ”.

⁹Vae, qui contradicit fictori suo, testa de vasis fictilibus terrae! Numquid dicet lutum figulo suo: “ Quid facis? ” et “ Opus tuum absque manibus est ”?

¹⁰Vae, qui dicit patri: “ Quid generas? ” et mulieri: “ Quid parturis? ”.

¹¹Haec dicit Dominus, Sanctus Israel, plastes eius: “ Numquid ventura interrogatis me super filios meos et super opus manuum mearum mandatis mihi?

¹²Ego feci terram et hominem super eam creavi ego; manus meae tetenderunt caelos, et omni militiae eorum mandavi.

¹³Ego suscitavi eum in iustitia et omnes vias eius dirigam; ipse aedificabit civitatem meam et captivitatem meam dimittet non in pretio neque in muneribus ”, dicit Dominus exercituum.

¹⁴Haec dicit Dominus: “ Labor Aegypti et negotiatio Aethiopiae et Sabaim viri sublimes ad te transibunt et tui erunt; post te ambulabunt, vincti manicis pergent et te adorabunt teque deprecabuntur: “Tantum in te est Deus, et non est absque te Deus!”.

¹⁵Vere tu es Deus absconditus, Deus Israel, salvator.

¹⁶Confusi sunt et erubuerunt omnes, simul abierunt in confusionem fabricatores idolorum.

¹⁷Israel salvatus est in Domino salute aeterna; non confundemini et non erubescetis usque in saeculum saeculi.

¹⁸Quia haec dicit Dominus, qui creavit caelos, ipse Deus, qui formavit terram et fecit eam, ipse fundavit eam; non ut vacua esset, creavit eam, ut habitaretur, formavit eam: “ Ego Dominus, et non est alius.

¹⁹Non in abscondito locutus sum, in loco terrae tenebroso; non dixi semini Iacob: “Frustra quaerite me”. Ego Dominus loquens iustitiam, annuntians recta.

²⁰Congregamini et venite et accedite simul, qui salvati estis ex gentibus. Nescierunt, qui levant lignum sculpturae suae et rogant deum non salvantem.

²¹Annuntiate et venite et consiliamini simul. Quis auditum fecit hoc ab initio, ex tunc praedixit illud? Numquid non ego Dominus, et non est ultra Deus absque me? Deus iustus et salvans non est praeter me.

²²Convertimini ad me et salvi eritis, omnes fines terrae, quia ego Deus, et non est alius.

²³In memetipso iuravi: Egressa est de ore meo iustitia, verbum, quod non revertetur; quia mihi curvabitur omne genu, et iurabit omnis lingua ”.

²⁴“ Tantum in Domino ” dicent “ sunt iustitiae et robur! ”. Ad eum venient et confundentur omnes, qui repugnant ei;

²⁵in Domino iustificabitur et laudabitur omne semen Israel.