Read Nova_Vulgata Leviticus 13 Bible Online

Leviticus 13 - Nova_Vulgata bible

Leviticus 13

¹Locutus est Dominus ad Moysen et Aaron dicens:

²“ Homo, in cuius carne et cute ortus fuerit tumor sive pustula aut quasi lucens quippiam, id est plaga leprae, adducetur ad Aaron sacerdotem vel ad unum quemlibet filiorum eius sacerdotum.

³Qui cum viderit plagam in cute et pilos in album mutatos colorem ipsamque speciem plagae humiliorem cute et carne reliqua: plaga leprae est; quod cum viderit sacerdos, eum immundum esse decernet.

⁴Sin autem lucens candor fuerit in cute nec humilior carne reliqua, et pili coloris pristini, recludet eum sacerdos septem diebus.

⁵Et considerabit eum die septimo: et, siquidem plaga ultra non creverit nec transierit in cute priores terminos, rursum recludet eum septem diebus aliis.

⁶Et die septimo contemplabitur eum iterum: si obscurior fuerit plaga et non creverit in cute, eum mundum esse decernet, quia scabies est. Lavabitque homo vestimenta sua et mundus erit.

⁷Quod si, postquam a sacerdote visus est et redditus munditiae, iterum scabies creverit, adducetur ad eum;

⁸et, si viderit ita esse, immunditiae condemnabitur: est lepra.

⁹Plaga leprae si fuerit in homine, adducetur ad sacerdotem,

¹⁰et videbit eum. Cumque tumor albus in cute fuerit et capillorum mutaverit aspectum in album, caro quoque viva creverit in tumore,

¹¹lepra vetustissima iudicabitur atque inolita cuti. Contaminabit itaque eum sacerdos et non recludet, quia perspicue immunditia est.

¹²Sin autem effloruerit discurrens lepra in cute et operuerit omnem cutem a capite usque ad pedes, quidquid sub aspectu oculorum cadit,

¹³considerabit eum sacerdos et teneri lepra mundissima iudicabit, eo quod omnis in candorem versa sit, et idcirco homo mundus erit.

¹⁴Quando vero caro vivens in eo apparuerit, immundus erit.

¹⁵Quod cum sacerdos viderit, inter immundos reputabit; caro enim viva immunda est: lepra est.

¹⁶Quod si rursum versa fuerit in alborem, veniet ad sacerdotem,

¹⁷qui cum hoc consideraverit, eum mundum esse decernet.

¹⁸Caro et cutis, in qua ulcus natum est et sanatum,

¹⁹et in loco ulceris tumor apparuerit albus sive macula subrufa, ostendet se homo sacerdoti.

²⁰Qui cum viderit locum maculae humiliorem carne reliqua et pilos versos in candorem, contaminabit eum: plaga enim leprae orta est in ulcere.

²¹Quod si pilus coloris est pristini et cicatrix subobscura et vicina carne non est humilior, recludet eum septem diebus.

²²Et, siquidem creverit, adiudicabit eum leprae;

²³sin autem steterit in loco suo macula nec creverit, ulceris est cicatrix, et sacerdos eum mundum esse decernet.

²⁴Vel si alicuius cutem ignis exusserit, et locus exustionis subrufam sive albam habuerit maculam,

²⁵considerabit eam sacerdos; et ecce pilus versus est in alborem, et locus eius reliqua cute humilior, contaminabit eum, quia plaga leprae in cicatrice orta est.

²⁶Quod si pilorum color non fuerit immutatus, nec humilior macula carne reliqua, et ipsa leprae species fuerit subobscura, recludet eum septem diebus.

²⁷Et die septimo contemplabitur eum; si creverit in cute macula, contaminabit eum: plaga est leprae;

²⁸sin autem in loco suo macula steterit non satis clara, tumor combustionis est, et idcirco mundabit eum, quia cicatrix est combusturae.

²⁹Vir sive mulier, in cuius capite vel barba germinarit plaga, videbit eam sacerdos.

³⁰Et, siquidem humilior fuerit locus carne reliqua, et capillus flavus solitoque subtilior, contaminabit eos, quia scabies est, lepra capitis vel barbae.

³¹Sin autem viderit plagam scabiei aequalem vicinae carni nec capillum nigrum in ea, recludet eos septem diebus.

³²Et die septimo intuebitur plagam: si non creverit scabies, nec capillus flavus fuerit in ea, et locus plagae carni reliquae aequalis,

³³radetur homo absque loco maculae, et includet eum sacerdos septem diebus aliis.

³⁴Si die septimo visa fuerit stetisse plaga in loco suo nec humilior carne reliqua, mundabit eum sacerdos; lotisque vestibus mundus erit.

³⁵Sin autem post emundationem rursus creverit scabies in cute,

³⁶non quaeret amplius utrum capillus in flavum colorem sit commutatus, quia aperte immundus est.

³⁷Porro si steterit macula, et capilli nigri fuerint, noverit hominem esse sanatum et confidenter eum pronuntiet mundum.

³⁸Vir et mulier, in cuius cute maculae, maculae albae apparuerint,

³⁹intuebitur eos sacerdos. Si deprehenderit subobscurum alborem lucere in cute, sciat impetiginem ortam esse in cute; mundus est.

⁴⁰Vir, de cuius capite capilli fluunt, calvus ac mundus est;

⁴¹et, si a fronte ceciderint pili, recalvaster et mundus est.

⁴²Sin autem in calvitio sive in recalvatione plaga alba vel subrufa fuerit exorta, lepra est capitis.

⁴³Sacerdos eum videbit, et ecce tumor plagae subrufus secundum aspectum leprae cutis carnis.

⁴⁴Vir maculatus est lepra, et sacerdos omnino decernet eum esse immundum; plaga est in capite eius.

⁴⁵Leprosus hac plaga percussus habebit vestimenta dissuta, comam capitis excussam, barbam contectam; clamabit: "Immundus! Immundus!".

⁴⁶Omni tempore, quo leprosus est immundus, immundus est et solus habitabit extra castra.

⁴⁷Si in veste lanea sive linea lepra fuerit,

⁴⁸in stamine sive subtemine lineo vel laneo aut in pelle vel quolibet ex pelle confecto,

⁴⁹si macula pallida aut rufa fuerit, lepra reputabitur ostendeturque sacerdoti.

⁵⁰Qui considerabit macula infectum et recludet septem diebus;

⁵¹et die septimo rursus aspiciens, si crevisse deprehenderit, lepra maligna est; pollutum iudicabit vestimentum et omne, in quo fuerit inventa,

⁵²et idcirco comburetur flammis.

⁵³Quod si eam viderit non crevisse,

⁵⁴praecipiet, et lavabunt id, in quo plaga est; recludetque illud septem diebus aliis.

⁵⁵Et cum viderit post lavationem faciem quidem pristinam non mutatam, nec tamen crevisse plagam, immunda est res, et igne combures eam, eo quod infusa sit plaga in superficie rei vel in parte aversa.

⁵⁶Sin autem obscurior fuerit locus plagae, postquam res est lota, sacerdos abrumpet eum et a solido dividet.

⁵⁷Quod si macula ultra apparuerit in his rebus, quae prius immaculata erant, lepra volatilis et vaga, igne combures illas.

⁵⁸Quas vero laveris et a quibus cessaverit plaga, illas lavabis secundo, et mundae erunt.

⁵⁹Ista est lex leprae vestimenti lanei et linei, staminis atque subteminis, omnisque supellectilis pelliceae, quomodo mundari debeat vel contaminari ”.