Read Nova_Vulgata Leviticus 4 Bible Online

Leviticus 4 - Nova_Vulgata bible

Leviticus 4

¹Locutusque est Dominus ad Moysen dicens:

²“ Loquere filiis Israel: Anima cum peccaverit per ignorantiam et de universis mandatis Domini, quae praecepit ut non fierent, quippiam fecerit,

³si sacerdos, qui est unctus, peccaverit, delinquere faciens populum, offeret pro peccato suo vitulum immaculatum Domino sacrificium pro peccato;

⁴et adducet illum ad ostium tabernaculi conventus coram Domino ponetque manum super caput eius et immolabit eum coram Domino.

⁵Hauriet quoque sacerdos unctus de sanguine vituli inferens illum in tabernaculum conventus;

⁶cumque intinxerit digitum in sanguinem, asperget eo septies coram Domino contra velum sanctuarii;

⁷ponetque de eodem sanguine super cornua altaris thymiamatis gratissimi coram Domino, quod est in tabernaculo conventus; omnem autem reliquum sanguinem fundet in basim altaris holocausti in introitu tabernaculi.

⁸Et omnem adipem vituli pro peccato auferet tam eum, qui operit vitalia, quam omnem, qui vitalibus adhaeret,

⁹duos renunculos et adipem, qui est super eos iuxta ilia, et reticulum iecoris, quem iuxta renunculos, auferet,

¹⁰sicut aufertur de vitulo hostiae pacificorum; et adolebit ea sacerdos super altare holocausti.

¹¹Pellem vero et omnes carnes cum capite et pedibus et intestinis et fimo,

¹²totum vitulum efferet extra castra in locum mundum, ubi cineres effundi solent; incendetque eum super lignorum struem igne: in loco effusorum cinerum cremabitur.

¹³Quod si omnis coetus Israel ignoraverit, et res abscondita fuerit ab oculis congregationis, feceritque quod contra mandatum Domini est et deliquerit,

¹⁴et postea intellexerit peccatum suum, offeret congregatio vitulum pro peccato adducetque eum ad ostium tabernaculi conventus.

¹⁵Et ponent seniores coetus populi manus super caput eius coram Domino, immolatoque vitulo in conspectu Domini,

¹⁶inferet sacerdos, qui unctus est, de sanguine eius in tabernaculum conventus,

¹⁷tincto digito aspergens septies contra velum;

¹⁸ponetque de eodem sanguine in cornibus altaris, quod est coram Domino in tabernaculo conventus. Reliquum autem sanguinem fundet iuxta basim altaris holocaustorum, quod est in ostio tabernaculi conventus;

¹⁹omnemque eius adipem tollet et adolebit super altare.

²⁰Sic faciens et de hoc vitulo quomodo fecit de vitulo pro peccato; sic faciet ei. Expiante eos sacerdote, propitius erit Dominus.

²¹Ipsum autem vitulum efferet extra castra atque comburet sicut et priorem vitulum: sacrificium pro peccato est congregationis.

²²Si peccaverit princeps et fecerit unum ex omnibus per ignorantiam, quod Domini Dei sui lege prohibetur, deliqueritque,

²³aut indicatum ei fuerit peccatum suum, offeret hostiam Domino hircum de capris immaculatum

²⁴ponetque manum suam super caput eius et immolabit eum in loco, ubi solet mactari holocaustum coram Domino: sacrificium pro peccato est.

²⁵Et tinguat sacerdos digitum in sanguine hostiae pro peccato ponetque super cornua altaris holocausti et reliquum fundet ad basim eius.

²⁶Adipem vero adolebit supra, sicut in victimis pacificorum fieri solet; expiabitque eum a peccato eius, ac dimittetur ei.

²⁷Quod si peccaverit anima per ignorantiam de populo terrae, ut faciat quidquam ex his, quae Domini lege prohibentur, atque delinquat,

²⁸aut indicatum ei fuerit peccatum suum, offeret capram immaculatam;

²⁹ponetque manum super caput hostiae pro peccato et immolabit eam in loco holocausti.

³⁰Tolletque sacerdos de sanguine in digito suo et ponet super cornua altaris holocausti et reliquum fundet ad basim eius.

³¹Omnem autem auferens adipem, sicut auferri solet de victimis pacificorum, adolebit super altare in odorem suavitatis Domino, expiabitque eum, et propitius erit Dominus.

³²Sin autem de ovibus obtulerit victimam pro peccato, adducet agnam immaculatam;

³³ponet manum super caput eius et immolabit eam in loco, ubi solent holocaustorum caedi hostiae.

³⁴Sumetque sacerdos de sanguine eius digito suo et ponens super cornua altaris holocausti reliquum fundet ad basim eius.

³⁵Omnem quoque auferens adipem, sicut auferri solet adeps agni, qui immolatur pro pacificis, cremabit in altari super incensis Domini; expiabitque eum et peccatum eius, et dimittetur illi.