Read Nova_Vulgata Leviticus 7 Bible Online

Leviticus 7 - Nova_Vulgata bible

Leviticus 7

¹Haec quoque est lex sacrificii pro delicto: sanctum sanctorum est,

²idcirco, ubi immolatur holocaustum, mactabitur et victima pro delicto; sanguis eius per gyrum fundetur altaris.

³Omnemque adipem offeret ex ea, caudam scilicet et adipem, qui operit vitalia,

⁴duos renunculos et pinguedinem, quae super eos iuxta ilia est, reticulumque iecoris, quem iuxta renunculos, auferet;

⁵et adolebit ea sacerdos super altare ut incensum Domino: sacrificium pro delicto est.

⁶Omnis masculus de sacerdotali genere in loco sancto vescetur his carnibus, quia sanctum sanctorum est.

⁷Sicut sacrificium pro peccato, ita et sacrificium pro delicto, utriusque hostiae lex una est; ad sacerdotem, qui eam obtulerit, pertinebit.

⁸Sacerdos, qui offert holocaustum cuiusdam viri, habebit pellem victimae,

⁹et omne sacrificium similae, quod coquitur in clibano, et, quidquid in frixorio vel in sartagine praeparatur, eius erit sacerdotis, a quo offertur;

¹⁰et omne sacrificium similae sive oleo conspersum sive aridum fuerit, cunctis filiis Aaron aequa mensura per singulos dividetur.

¹¹Haec est lex hostiae pacificorum quae offertur Domino;

¹²si pro gratiarum actione fuerit oblatio, offerent panes absque fermento conspersos oleo et lagana azyma uncta oleo coctamque similam ut collyridas olei admixtione conspersas,

¹³panes quoque fermentatos cum hostia pacificorum pro gratiarum actione,

¹⁴ex quibus unus offeretur munus Domino et erit sacerdotis, qui fundet hostiae sanguinem.

¹⁵Cuius carnes eadem comedentur die, nec remanebit ex eis quidquam usque mane.

¹⁶Si voto vel sponte quisquam obtulerit hostiam, eadem similiter edetur die; sed et si quid in crastinum remanserit, vesci licitum est;

¹⁷quidquid autem tertius invenerit dies, ignis absumet.

¹⁸Si quis de carnibus victimae pacificorum die tertio comederit, irrita fiet oblatio nec proderit offerenti; quin potius, quaecumque anima tali se edulio contaminarit, praevaricationis rea erit.

¹⁹Caro, quae aliquid tetigerit immundum, non comedetur, sed comburetur igni; ceterum carne, qui fuerit mundus, vescetur.

²⁰Anima polluta, quae ederit de carnibus hostiae pacificorum, quae oblata est Domino, peribit de populis suis;

²¹et, quae tetigerit immunditiam hominis vel iumenti, sive omnis rei abominabilis, quae polluere potest, et comederit de huiuscemodi carnibus, interibit de populis suis ”.

²²Locutusque est Dominus ad Moysen dicens:

²³“ Loquere filiis Israel: Adipem bovis et ovis et caprae non comedetis.

²⁴Adipem cadaveris morticini et eius animalis, quod a bestia laceratum est, habebitis in usus varios, sed non comedetis.

²⁵Si quis adipem, qui offertur in incensum Domini, comederit, peribit de populo suo.

²⁶Sanguinem quoque omnis animalis non sumetis in cibo, tam de avibus quam de pecoribus;

²⁷omnis anima, quae ederit sanguinem, peribit de populis suis ”.

²⁸Locutus est Dominus ad Moysen dicens:

²⁹“ Loquere filiis Israel: Qui offert victimam pacificorum Domino, afferat oblationem suam Domino de victima pacificorum.

³⁰Tenebit manibus incensa Domini, adipem scilicet et pectusculum afferet; pectusculum, ut elevetur coram Domino.

³¹Et sacerdos adolebit adipem super altare; pectusculum autem erit Aaron et filiorum eius.

³²Armus quoque dexter de pacificorum hostiis cedet in munus sacerdotis.

³³Qui de filiis Aaron obtulerit sanguinem et adipem victimae pacificorum, ipse habebit armum dextrum in portione sua;

³⁴pectusculum enim elationis et armum donationis tuli a filiis Israel de hostiis eorum pacificis et dedi Aaron sacerdoti ac filiis eius, lege perpetua, ab omni populo Israel ”.

³⁵Haec est portio Aaron et filiorum eius de incensis Domini die, qua applicavit eos, ut sacerdotio fungerentur;

³⁶et quae praecepit dari eis Dominus a filiis Israel die, qua unxit eos, religione perpetua in generationibus eorum.

³⁷Ista est lex holocausti et oblationis similae et sacrificii pro peccato atque delicto et pro consecratione et pacificorum victimis,

³⁸quam constituit Dominus Moysi in monte Sinai, quando mandavit filiis Israel, ut offerrent oblationes suas Domino in deserto Sinai.