Read Nova_Vulgata Osee 4 Bible Online

Osee 4 - Nova_Vulgata bible

Osee 4

¹“ Audite verbum Domini, filii Israel, quia iudicium Domino cum habitatoribus terrae: non est enim veritas, et non est benignitas, et non est scientia Dei in terra;

²maledictum et mendacium et homicidium et furtum et adulterium inundaverunt, et sanguis sanguinem tetigit.

³Propter hoc lugebit terra, et infirmabitur omnis, qui habitat in ea, cum bestia agri et volucre caeli, sed et pisces maris auferentur.

⁴Verumtamen non sit qui contendat nec qui arguat, sed tecum iudicium meum, sacerdos.

⁵Et corrues plena die, et corruet etiam propheta tecum nocte; et perdam matrem tuam.

⁶Perit populus meus, eo quod non habuerit scientiam. Quia tu scientiam reppulisti, repellam te, ne sacerdotio fungaris mihi; et quia oblitus es legis Dei tui, obliviscar filiorum tuorum et ego.

⁷Secundum multitudinem eorum, sic peccaverunt mihi; gloriam eorum in ignominiam commutabo.

⁸Peccatum populi mei comedunt et ad iniquitatem eorum sublevabunt animas eorum.

⁹Et erit sicut populus sic sacerdos; et visitabo super eum vias eius et opera eius reddam ei.

¹⁰Et comedent et non saturabuntur; fornicabuntur et non multiplicabuntur, quoniam Dominum reliquerunt in non custodiendo.

¹¹Fornicatio et vinum et ebrietas auferunt cor.

¹²Populus meus in ligno suo interrogat, et baculus eius annuntiat ei; spiritus enim fornicationum decepit eos, et fornicantur a Deo suo.

¹³Super capita montium sacrificant et super colles accendunt thymiama, subtus quercum et populum et terebinthum, quia bona est umbra eius; ideo fornicantur filiae vestrae, et sponsae vestrae adulterae sunt.

¹⁴Non visitabo super filias vestras, cum fuerint fornicatae, et super sponsas vestras, cum adulteraverint, quoniam hi ipsi cum meretricibus secedunt et cum prostibulis delubrorum sacrificant, et populus non intellegens corruet.

¹⁵Si fornicaris tu, Israel, non delinquat saltem Iuda; et nolite ingredi in Galgala et ne ascenderitis in Bethaven neque iuraveritis: “Vivit Dominus”.

¹⁶Quoniam sicut vacca lasciviens Israel contumax est; nunc pascet eos Dominus quasi agnum in latitudine?

¹⁷Particeps idolorum Ephraim, dimitte eum.

¹⁸Transiit convivium eorum, fornicatione fornicati sunt, diligunt vehementer ignominiam impudicitiae.

¹⁹Ligabit spiritus eos in alis suis, et confundentur a sacrificiis suis.