Read Nova_Vulgata Amos 3 Bible Online

Amos 3 - Nova_Vulgata bible

Amos 3

¹Audite verbum hoc, quod locutus est Dominus super vos, filii Israel, super omnem cognationem, quam eduxi de terra Aegypti, dicens:

²“ Tantummodo vos cognovi ex omnibus cognationibus terrae; idcirco visitabo super vos omnes iniquitates vestras.

³Numquid ambulabunt duo pariter, nisi convenerint?

⁴Numquid rugiet leo in saltu, nisi habuerit praedam? Numquid dabit catulus leonis vocem de cubili suo, nisi aliquid apprehenderit?

⁵Numquid cadet avis super terram absque laqueo? Numquid laxatur laqueus de terra, antequam quid ceperit?

⁶Si clanget tuba in civitate, populus non expavescet? Si erit malum in civitate, nonne Dominus fecit?

⁷Nihil enim faciet Dominus Deus, nisi revelaverit secretum suum ad servos suos prophetas.

⁸Leo rugit, quis non timebit? Dominus Deus locutus est, quis non prophetabit?

⁹Auditum facite in aedibus Assyriae et in aedibus terrae Aegypti et dicite: “Congregamini super montes Samariae”; et videte insanias multas in medio eius et oppressos in sinu eius.

¹⁰Et nescierunt facere rectum, dicit Dominus, thesaurizantes violentiam et rapinas in aedibus suis ”.

¹¹Propterea haec dicit Dominus Deus: “ Inimicus circumdabit terram, et detrahetur ex te fortitudo tua, et diripientur aedes tuae ”.

¹²Haec dicit Dominus: “ Quomodo si eruat pastor de ore leonis duo crura aut extremum auriculae, sic eruentur filii Israel, qui habitant in Samaria, in margine lectuli et in Damasci grabato.

¹³Audite et contestamini in domo Iacob, dicit Dominus, Deus exercituum:

¹⁴In die cum visitavero praevaricationes Israel, super eum visitabo et super altaria Bethel, et amputabuntur cornua altaris et cadent in terram;

¹⁵et percutiam domum hiemalem cum domo aestiva, et peribunt domus eburneae, et dissipabuntur aedes magnae ”, dicit Dominus.