Read Nova_Vulgata Amos 6 Bible Online

Amos 6 - Nova_Vulgata bible

Amos 6

¹Vae, qui tranquilli sunt in Sion et confidunt in monte Samariae; designati primitiae populorum, ad quos venit domus Israel!

²Transite in Chalanne et videte; et ite inde in Emath magnam et descendite in Geth Palaestinorum. Numquid meliores regnis istis vos, aut latior terminus eorum termino vestro est?

³Qui removetis diem malum et appropinquare facitis solium violentiae.

⁴Qui dormiunt in lectis eburneis, recumbentes in stratis suis, comedentes agnos de grege et vitulos de medio armenti;

⁵canentes ad vocem psalterii, sicut David excogitant sibi vasa cantici;

⁶bibentes vinum in phialis, optimis unguentis delibuti, et non sunt contristati super ruina Ioseph.

⁷Quapropter nunc migrabunt in capite transmigrantium, et auferetur factio lascivientium.

⁸Iuravit Dominus Deus in anima sua, dicit Dominus, Deus exercituum: “ Detestor ego superbiam Iacob et domos eius odi et tradam civitatem et plenitudinem eius ”.

⁹Quod si reliqui fuerint decem viri in domo una, et ipsi morientur;

¹⁰et tollet eum propinquus suus et comburet eum, ut efferat ossa de domo, et dicet ei, qui in penetralibus domus est: “ Numquid adhuc est penes te? ”. Et respondebit: “Non est”; et dicet ei: “Tace!”; non est qui recordetur nominis Domini.

¹¹Quia ecce Dominus mandat et percutiet domum maiorem ruinis et domum minorem scissionibus.

¹²Numquid currunt in petris equi, aut aratur mare in bobus, quoniam convertistis in venenum iudicium et fructum iustitiae in absinthium?

¹³Qui laetantur pro Lodabar, qui dicunt: “ Numquid non in fortitudine nostra cepimus nobis Carnaim? ”.

¹⁴“ Ecce enim suscitabo super vos, domus Israel, dicit Dominus, Deus exercituum, gentem; et oppriment vos ab introitu Emath usque ad torrentem Arabae ”.