Read Nova_Vulgata Numeri 10 Bible Online

Numeri 10 - Nova_Vulgata bible

Numeri 10

¹Locutusque est Dominus ad Moysen dicens:

²“ Fac tibi duas tubas argenteas ductiles, quibus convocare possis congregationem, quando movenda sunt castra.

³Cumque increpueris tubis, congregabitur ad te omnis turba ad ostium tabernaculi conventus.

⁴Si semel clangueris, venient ad te principes et capita congregationis Israel;

⁵si autem prolixior clangor increpuerit, movebunt castra primi, qui sunt ad orientalem plagam;

⁶in secundo autem sonitu et pari ululatu tubae levabunt tentoria, qui habitant ad meridiem, et iuxta hunc modum reliqui facient, ululantibus tubis in profectionem.

⁷Quando autem congregandus est populus, simplex tubarum clangor erit, et non ululabunt.

⁸Filii autem Aaron sacerdotes clangent tubis. Eritque hoc vobis legitimum sempiternum in generationibus vestris.

⁹Si exieritis ad bellum in terra vestra contra hostes, qui dimicant adversum vos, clangetis ululantibus tubis; et erit recordatio vestri coram Domino Deo vestro, ut eruamini de manibus inimicorum vestrorum.

¹⁰Si quando habebitis epulum et dies festos et calendas, canetis tubis super holocaustis vestris et pacificis victimis, ut sint vobis in recordationem Dei vestri. Ego Dominus Deus vester ”.

¹¹Anno secundo, mense secundo, vicesima die mensis elevata est nubes de habitaculo testimonii;

¹²profectique sunt filii Israel per migrationes suas de deserto Sinai, et recubuit nubes in solitudine Pharan.

¹³Moveruntque castra prima vice, iuxta imperium Domini in manu Moysi.

¹⁴Elevatum est primum vexillum castrorum filiorum Iudae per turmas suas, quorum princeps erat Naasson filius Aminadab;

¹⁵et super turmam tribus filiorum Issachar fuit princeps Nathanael filius Suar;

¹⁶et super turmam tribus Zabulon erat princeps Eliab filius Helon.

¹⁷Depositumque est habitaculum, quod portantes egressi sunt filii Gerson et Merari.

¹⁸Profectum est vexillum castrorum filiorum Ruben per turmas suas, et super turbam suam princeps erat Elisur filius Sedeur.

¹⁹Super turmam autem tribus filiorum Simeon princeps fuit Salamiel filius Surisaddai.

²⁰Porro super turmam tribus filiorum Gad erat princeps Eliasaph filius Deuel.

²¹Profectique sunt et Caathitae portantes sanctuarium. Et erectum est habitaculum, antequam venirent.

²²Elevatum est vexillum castrorum filiorum Ephraim per turmas suas, in quorum exercitu princeps erat Elisama filius Ammiud.

²³Et super turmam tribus filiorum Manasse princeps fuit Gamaliel filius Phadassur;

²⁴et super turmam tribus filiorum Beniamin erat dux Abidan filius Gedeonis.

²⁵Novissime elevatum est vexillum castrorum filiorum Dan per turmas suas, in quorum exercitu princeps fuit Ahiezer filius Ammisaddai.

²⁶Et super turmam tribus filiorum Aser erat princeps Phegiel filius Ochran;

²⁷et super turmam tribus filiorum Nephthali princeps fuit Ahira filius Enan.

²⁸Hae sunt profectiones filiorum Israel per turmas suas, quando egrediebantur.

²⁹Dixitque Moyses Hobab filio Raguel Madianitae cognato suo: “ Proficiscimur ad locum, quem Dominus daturus est nobis; veni nobiscum, ut benefaciamus tibi, quia Dominus bona promisit Israeli ”.

³⁰Cui ille respondit: “ Non vadam tecum, sed revertar in terram meam, in qua natus sum ”.

³¹Et ille: “ Noli, inquit, nos relinquere; tu enim nosti in quibus locis per desertum castra ponere debeamus, et eris ductor noster.

³²Cumque nobiscum veneris, quidquid optimum fuerit ex opibus, quas nobis traditurus est Dominus, dabimus tibi ”.

³³Profecti sunt ergo de monte Domini viam trium dierum; arcaque foederis Domini praecedebat eos per dies tres providens castrorum locum.

³⁴Nubes quoque Domini super eos erat per diem, cum incederent.

³⁵Cumque elevaretur arca, dicebat Moyses: “ Surge, Domine, et dissipentur inimici tui; et fugiant, qui oderunt te, a facie tua ”.

³⁶Cum autem deponeretur, aiebat: “ Revertere, Domine, ad multitudinem exercitus Israel ”.