Read Nova_Vulgata Numeri 13 Bible Online

Numeri 13 - Nova_Vulgata bible

Numeri 13

¹Ibi locutus est Dominus ad Moysen dicens:

²“ Mitte vi ros, qui considerent terram Chanaan, quam daturus sum filiis Israel, singulos de singulis tribubus ex principibus ”.

³Fecit Moyses quod Dominus imperaverat, de deserto Pharan mittens principes viros, quorum ista sunt nomina:

⁴de tribu Ruben Sammua filium Zacchur,

⁵de tribu Simeon Saphat filium Hori,

⁶de tribu Iudae Chaleb filium Iephonne,

⁷de tribu Issachar Igal filium Ioseph,

⁸de tribu Ephraim Osee filium Nun,

⁹de tribu Beniamin Phalti filium Raphu,

¹⁰de tribu Zabulon Geddiel filium Sodi,

¹¹de tribu Ioseph, tribu Manasse, Gaddi filium Susi,

¹²de tribu Dan Ammiel filium Gemalli,

¹³de tribu Aser Sthur filium Michael,

¹⁴de tribu Nephthali Nahabi filium Vaphsi,

¹⁵de tribu Gad Guel filium Machi.

¹⁶Haec sunt nomina virorum, quos misit Moyses ad considerandam terram. Vocavitque Osee filium Nun Iosue.

¹⁷Misit ergo eos Moyses ad considerandam terram Chanaan et dixit ad eos: “ Ascendite per Nageb. Cumque veneritis ad montes,

¹⁸considerate terram, qualis sit, et populum, qui habitator est eius, utrum fortis sit an infirmus, si pauci numero an plures;

¹⁹ipsa terra bona an mala, urbes quales, absque muris an muratae;

²⁰humus pinguis an sterilis, nemorosa an absque arboribus. Confortamini et afferte nobis de fructibus terrae ”. Erat autem tempus, quando iam praecoquae uvae vesci possunt.

²¹Cumque ascendissent, exploraverunt terram a deserto Sin usque Rohob in introitu Emath.

²²Ascenderuntque ad Nageb et venerunt in Hebron, ubi erant Ahiman et Sesai et Tholmai filii Enac. Nam Hebron septem annis ante Tanim urbem Aegypti condita est.

²³Pergentesque usque ad Nehelescol absciderunt palmitem cum uva sua, quem portaverunt in vecte duo viri. De malis quoque granatis et de ficis loci illius tulerunt,

²⁴qui appellatus est Nehelescol, eo quod botrum portassent inde filii Israel.

²⁵Reversique exploratores terrae post quadraginta dies, omni regione circuita,

²⁶venerunt ad Moysen et Aaron et ad omnem coetum filiorum Israel in desertum Pharan, quod est in Cades. Locutique eis et omni congregationi ostenderunt fructus terrae

²⁷et narraverunt dicentes: “ Venimus in terram, ad quam misisti nos, quae re vera fluit lacte et melle, ut ex his fructibus cognosci potest.

²⁸Sed cultores fortissimos habet et urbes grandes atque muratas. Stirpem Enac vidimus ibi;

²⁹Amalec habitat in Nageb, Hetthaeus et Iebusaeus et Amorraeus in montanis, Chananaeus vero moratur iuxta mare et circa fluenta Iordanis ”.

³⁰Inter haec Chaleb compescens murmur populi, qui oriebatur contra Moysen, ait: “ Ascendamus et possideamus terram, quoniam poterimus obtinere eam ”.

³¹Alii vero, qui fuerant cum eo, dicebant: “ Nequaquam ad hunc populum valemus ascendere, quia fortior nobis est ”.

³²Detraxeruntque terrae, quam inspexerant, apud filios Israel dicentes: “ Terra, quam lustravimus, devorat habitatores suos; populus, quem aspeximus, procerae staturae est;

³³ibi vidimus gigantes, filios Enac de genere giganteo, quibus comparati quasi locustae videbamur ”.