Read Nova_Vulgata Numeri 4 Bible Online

Numeri 4 - Nova_Vulgata bible

Numeri 4

¹Locutusque est Dominus ad Moysen et Aaron dicens:

²“ Tolle summam filiorum Caath de medio Levitarum per familias et domos suas

³a tricesimo anno et supra usque ad quinquagesimum annum omnium, qui ingrediuntur, ut stent et ministrent in tabernaculo conventus.

⁴Hic est cultus filiorum Caath in tabernaculo conventus: sanctum sanctorum.

⁵Ingredientur Aaron et filii eius, quando movenda sunt castra, et deponent velum, quod pendet ante fores, involventque eo arcam testimonii;

⁶et operient rursum velamine pellium delphini extendentque desuper pallium totum hyacinthinum et inducent vectes.

⁷Mensam quoque propositionis involvent hyacinthino pallio et ponent cum ea acetabula et phialas, cyathos et crateras ad liba fundenda; panes semper in ea erunt.

⁸Extendentque desuper pallium coccineum, quod rursum operient velamento pellium delphini et inducent vectes.

⁹Sument et pallium hyacinthinum, quo operient candelabrum cum lucernis et forcipibus suis et emunctoriis et cunctis vasis olei, quae ad concinnandas lucernas necessaria sunt;

¹⁰et super omnia ponent operimentum pellium delphini et ponent super feretrum.

¹¹Nec non et altare aureum involvent hyacinthino vestimento et extendent desuper operimentum pellium delphini et inducent vectes.

¹²Omnia vasa, quibus ministratur in sanctuario, involvent hyacinthino pallio; et extendent desuper operimentum pellium delphini ponentque super feretrum.

¹³Sed et altare mundabunt cinere et involvent illud purpureo vestimento;

¹⁴ponentque super illud omnia vasa, quibus in ministerio eius utuntur, id est ignium receptacula, fuscinulas ac vatilla et pateras. Cuncta vasa altaris operient simul velamine pellium delphini et inducent vectes.

¹⁵Cumque involverint Aaron et filii eius sanctuarium et omnia vasa eius in commotione castrorum, tunc intrabunt filii Caath, ut portent involuta, et non tangent sanctuarium, ne moriantur. Ista sunt onera filiorum Caath in tabernaculo conventus.

¹⁶Ad curam Eleazari filii Aaron sacerdotis pertinet oleum ad concinnandas lucernas et gratissimum incensum et oblatio, quae semper offertur, et oleum unctionis et quidquid ad cultum habitaculi pertinet omniumque vasorum, quae in sanctuario sunt ”.

¹⁷Locutusque est Dominus ad Moysen et Aaron dicens:

¹⁸“ Nolite perdere populum Caath de medio Levitarum,

¹⁹sed hoc facite eis, ut vivant et non moriantur, quando appropinquant ad sancta sanctorum: Aaron et filii eius intrabunt ipsique disponent opera singulorum et divident quid portare quis debeat.

²⁰Non intrabunt ad videndum, nec puncto quidem, sanctuarium; alioquin morientur ”.

²¹Locutusque est Dominus ad Moysen dicens:

²²“ Tolle summam etiam filiorum Gerson per domos ac familias et cognationes suas;

²³a triginta annis et supra usque ad annos quinquaginta numera omnes, qui ingrediuntur et ministrant in tabernaculo conventus.

²⁴Hoc est officium familiarum Gersonitarum,

²⁵ut portent cortinas habitaculi, tabernaculum conventus, operimentum eius et super illud velamen delphini velumque, quod pendet in introitu tabernaculi conventus,

²⁶cortinas atrii et velum in introitu atrii, quod est circa habitaculum et altare, funiculos et vasa ministerii, omnia, quae facta sunt, ut eis laborent.

²⁷Iubente Aaron et filiis eius, portabunt filii Gerson, et scient singuli cui debeant oneri mancipari.

²⁸Hic est cultus familiarum Gersonitarum in tabernaculo conventus; eruntque sub manu Ithamar filii Aaron sacerdotis.

²⁹Filios quoque Merari per familias et domos patrum suorum recensebis

³⁰a triginta annis et supra usque ad annos quinquaginta, omnes, qui ingrediuntur ad officium ministerii sui et cultum tabernaculi conventus.

³¹Haec sunt onera eorum: portabunt tabulas habitaculi et vectes eius, columnas ac bases earum,

³²columnas quoque atrii per circuitum cum basibus et paxillis et funibus suis; omnia vasa et supellectilem ad numerum accipient sicque portabunt.

³³Hoc est officium familiarum Meraritarum et ministerium in tabernaculo conventus; eruntque sub manu Ithamar filii Aaron sacerdotis ”.

³⁴Recensuerunt igitur Moyses et Aaron et principes synagogae filios Caath per cognationes et domos patrum suorum

³⁵a triginta annis et supra usque ad annum quinquagesimum, omnes, qui ingrediuntur ad ministerium tabernaculi conventus;

³⁶et inventi sunt duo milia septingenti quinquaginta.

³⁷Hic est numerus familiarum Caath, qui ministrant in tabernaculo conventus: hos numeravit Moyses et Aaron iuxta sermonem Domini per manum Moysi.

³⁸Numerati sunt et filii Gerson per cognationes et domos patrum suorum

³⁹a triginta annis et supra usque ad quinquagesimum annum, omnes, qui ingrediuntur, ut ministrent in tabernaculo conventus;

⁴⁰et inventi sunt secundum familias et domus patrum suorum duo milia sescenti triginta.

⁴¹Hic est numerus Gersonitarum, omnes, qui ministrant in tabernaculo conventus, quos numeraverunt Moy ses et Aaron iuxta verbum Domini.

⁴²Numeratae sunt et familiae filiorum Merari per cognationes et domos patrum suorum

⁴³a triginta annis et supra usque ad annum quinquagesimum, omnes, qui ingrediuntur ad explendos ritus tabernaculi conventus;

⁴⁴et inventi sunt tria milia ducenti.

⁴⁵Hic est numerus familiarum filiorum Merari, quos recensuerunt Moyses et Aaron iuxta imperium Domini per manum Moysi.

⁴⁶Omnes, qui recensiti sunt de Levitis et quos recenseri fecit ad nomen Moyses et Aaron et principes Israel per cognationes et domos patrum suorum

⁴⁷a triginta annis et supra usque ad annum quinquagesimum ingredientes ad ministerium tabernaculi et onera portanda in tabernaculo conventus,

⁴⁸fuerunt simul octo milia quingenti octoginta.

⁴⁹Iuxta verbum Domini per manum Moysi recensuit eos unumquemque iuxta officium et onera sua, sicut praeceperat ei Dominus.