Read Nova_Vulgata Habacuc 2 Bible Online

Habacuc 2 - Nova_Vulgata bible

Habacuc 2

¹Super custodiam meam stabo et consistam super speculam et contemplabor, ut videam quid dicat mihi et quid respondeat ad querelam meam.

²Et respondit mihi Dominus et dixit: “ Scribe visum et explana eum super tabulas, ut percurrat, qui legerit eum.

³Quia adhuc visus ad tempus constitutum, sed anhelat in finem et non mentietur; si moram fecerit, exspecta illum, quia veniens veniet et non tardabit.

⁴Ecce languidus, in quo non est anima recta; iustus autem in fide sua vivet ”.

⁵Et profecto divitiae decipiunt virum superbum, et non perveniet ad finem; qui dilatat quasi infernus fauces suas et ipse quasi mors et non adimpletur: et congregat ad se omnes gentes et coacervat ad se omnes populos.

⁶Numquid non omnes isti super eum parabolam sument et loquelam aenigmatum dicentes: “ Vae ei, qui multiplicat non sua — usquequo? C et aggravat pignora super se! ”.

⁷Numquid non repente consurgent, qui mordeant te, et evigilabunt agitantes te, et eris in rapinam eis?

⁸Quia tu spoliasti gentes multas, spoliabunt te omnes, qui reliqui fuerint de populis; propter sanguinem hominum et oppressionem terrae, civitatum et omnium habitantium in eis.

⁹Vae, qui congregat lucrum iniustum in malum domui suae, ut ponat in excelso nidum suum et salvet se de manu mali!

¹⁰Consilium cepisti in confusionem domui tuae concidendi populos multos et peccasti in animam tuam.

¹¹Quia lapis de pariete clamabit, et trabes de contignatione respondebit ei.

¹²Vae, qui aedificat civitatem in sanguinibus et condit urbem in iniquitate!

¹³Numquid non haec a Domino sunt exercituum, ut laborent populi pro igne, et gentes in vacuum fatigentur?

¹⁴Quia replebitur terra cognitione gloriae Domini, sicut aquae operiunt mare.

¹⁵Vae, qui potum dat amico suo mittens venenum suum et inebrians eum, ut aspiciat nuditatem eius!

¹⁶Repleris ignominia pro gloria; bibe tu quoque et denudare! Transibit ad te calix dexterae Domini, et veniet ignominia super gloriam tuam.

¹⁷Quia vastitas Libani operiet te, et miseria animalium deterrebit te propter sanguinem hominum et oppressionem terrae, civitatum et omnium habitantium in eis.

¹⁸Quid prodest sculptile, quia sculpsit illud fictor suus; conflatile et oraculum mendax, quia speravit in figmento fictor eius, ut faceret simulacra muta?

¹⁹Vae, qui dicit ligno: “ Expergiscere! ”, “ Surge! ” lapidi tacenti! Numquid ipse docere poterit? Ecce iste coopertus est auro et argento, et omnis spiritus non est in visceribus eius.

²⁰Dominus autem in templo sancto suo; sileat a facie eius omnis terra.