Read Nova_Vulgata Matthaeus 25 Bible Online

Matthaeus 25 - Nova_Vulgata bible

Matthaeus 25

¹Tunc simile erit regnum cae lorum decem virginibus, quae accipientes lampades suas exierunt obviam sponso.

²Quinque autem ex eis erant fatuae, et quinque prudentes.

³Fatuae enim, acceptis lampadibus suis, non sumpserunt oleum secum;

⁴prudentes vero acceperunt oleum in vasis cum lampadibus suis.

⁵Moram autem faciente sponso, dormitaverunt omnes et dormierunt.

⁶Media autem nocte clamor factus est: “Ecce sponsus! Exite obviam ei”.

⁷Tunc surrexerunt omnes virgines illae et ornaverunt lampades suas.

⁸Fatuae autem sapientibus dixerunt: “Date nobis de oleo vestro, quia lampades nostrae exstinguuntur”.

⁹Responderunt prudentes dicentes: “Ne forte non sufficiat nobis et vobis, ite potius ad vendentes et emite vobis”.

¹⁰Dum autem irent emere, venit sponsus, et quae paratae erant, intraverunt cum eo ad nuptias; et clausa est ianua.

¹¹Novissime autem veniunt et reliquae virgines dicentes: “Domine, domine, aperi nobis”.

¹²At ille respondens ait: “Amen dico vobis: Nescio vos”.

¹³Vigilate itaque, quia nescitis diem neque horam.

¹⁴Sicut enim homo peregre proficiscens vocavit servos suos et tradidit illis bona sua.

¹⁵Et uni dedit quinque talenta, alii autem duo, alii vero unum, unicuique secundum propriam virtutem, et profectus est. Statim

¹⁶abiit, qui quinque talenta acceperat, et operatus est in eis et lucratus est alia quinque;

¹⁷similiter qui duo acceperat, lucratus est alia duo.

¹⁸Qui autem unum acceperat, abiens fodit in terra et abscondit pecuniam domini sui.

¹⁹Post multum vero temporis venit dominus servorum illorum et ponit rationem cum eis.

²⁰Et accedens, qui quinque talenta acceperat, obtulit alia quinque talenta dicens: “Domine, quinque talenta tradidisti mihi; ecce alia quinque superlucratus sum”.

²¹Ait illi dominus eius: “Euge, serve bone et fidelis. Super pauca fuisti fidelis; supra multa te constituam: intra in gaudium domini tui”.

²²Accessit autem et qui duo talenta acceperat, et ait: “Domine, duo talenta tradidisti mihi; ecce alia duo lucratus sum”.

²³Ait illi dominus eius: “Euge, serve bone et fidelis. Super pauca fuisti fidelis; supra multa te constituam: intra in gaudium domini tui”.

²⁴Accedens autem et qui unum talentum acceperat, ait: “Domine, novi te quia homo durus es: metis, ubi non seminasti, et congregas, ubi non sparsisti;

²⁵et timens abii et abscondi talentum tuum in terra. Ecce habes, quod tuum est”.

²⁶Respondens autem dominus eius dixit ei: “Serve male et piger! Sciebas quia meto, ubi non seminavi, et congrego, ubi non sparsi?

²⁷Oportuit ergo te mittere pecuniam meam nummulariis, et veniens ego recepissem, quod meum est cum usura.

²⁸Tollite itaque ab eo talentum et date ei, qui habet decem talenta:

²⁹omni enim habenti dabitur, et abundabit; ei autem, qui non habet, et quod habet, auferetur ab eo.

³⁰Et inutilem servum eicite in tenebras exteriores: illic erit fletus et stridor dentium”.

³¹Cum autem venerit Filius hominis in gloria sua, et omnes angeli cum eo, tunc sedebit super thronum gloriae suae.

³²Et congregabuntur ante eum omnes gentes; et separabit eos ab invicem, sicut pastor segregat oves ab haedis,

³³et statuet oves quidem a dextris suis, haedos autem a sinistris.

³⁴Tunc dicet Rex his, qui a dextris eius erunt: “Venite, benedicti Patris mei; possidete paratum vobis regnum a constitutione mundi.

³⁵Esurivi enim, et dedistis mihi manducare; sitivi, et dedistis mihi bibere; hospes eram, et collegistis me;

³⁶nudus, et operuistis me; infirmus, et visitastis me; in carcere eram, et venistis ad me”.

³⁷Tunc respondebunt ei iusti dicentes: “Domine, quando te vidimus esurientem et pavimus, aut sitientem et dedimus tibi potum?

³⁸Quando autem te vidimus hospitem et collegimus, aut nudum et cooperuimus?

³⁹Quando autem te vidimus infirmum aut in carcere et venimus ad te?”.

⁴⁰Et respondens Rex dicet illis: “Amen dico vobis: Quamdiu fecistis uni de his fratribus meis minimis, mihi fecistis”.

⁴¹Tunc dicet et his, qui a sinistris erunt: “Discedite a me, maledicti, in ignem aeternum, qui praeparatus est Diabolo et angelis eius.

⁴²Esurivi enim, et non dedistis mihi manducare; sitivi, et non dedistis mihi potum;

⁴³hospes eram, et non collegistis me; nudus, et non operuistis me; infirmus et in carcere, et non visitastis me”.

⁴⁴Tunc respondebunt et ipsi dicentes: “Domine, quando te vidimus esurientem aut sitientem aut hospitem aut nudum aut infirmum vel in carcere et non ministravimus tibi?”.

⁴⁵Tunc respondebit illis dicens: “Amen dico vobis: Quamdiu non fecistis uni de minimis his, nec mihi fecistis”.

⁴⁶Et ibunt hi in supplicium aeternum, iusti autem in vitam aeternam ”.