Read Nova_Vulgata Marcus 13 Bible Online

Marcus 13 - Nova_Vulgata bible

Marcus 13

¹Et cum egrederetur de tem plo, ait illi unus ex discipulis suis: “ Magister, aspice quales lapides et quales structurae ”.

²Et Iesus ait illi: “ Vides has magnas aedificationes? Hic non relinquetur lapis super lapidem, qui non destruatur ”.

³Et cum sederet in montem Olivarum contra templum, interrogabat eum separatim Petrus et Iacobus et Ioannes et Andreas:

⁴“ Dic nobis: Quando ista erunt, et quod signum erit, quando haec omnia incipient consummari? ”.

⁵Iesus autem coepit dicere illis: “ Videte, ne quis vos seducat.

⁶Multi venient in nomine meo dicentes: “Ego sum”, et multos seducent.

⁷Cum audieritis autem bella et opiniones bellorum, ne timueritis; oportet fieri sed nondum finis.

⁸Exsurget enim gens super gentem, et regnum super regnum, erunt terrae motus per loca, erunt fames; initium dolorum haec.

⁹Videte autem vosmetipsos. Tradent vos conciliis, et in synagogis vapulabitis et ante praesides et reges stabitis propter me in testimonium illis.

¹⁰Et in omnes gentes primum oportet praedicari evangelium.

¹¹Et cum duxerint vos tradentes, nolite praecogitare quid loquamini, sed, quod datum vobis fuerit in illa hora, id loquimini: non enim estis vos loquentes sed Spiritus Sanctus.

¹²Et tradet frater fratrem in mortem, et pater filium; et consurgent filii in parentes et morte afficient eos;

¹³et eritis odio omnibus propter nomen meum. Qui autem sustinuerit in finem, hic salvus erit.

¹⁴Cum autem videritis abominationem desolationis stantem, ubi non debet, qui legit, intellegat: tunc, qui in Iudaea sunt, fugiant in montes;

¹⁵qui autem super tectum, ne descendat nec introeat, ut tollat quid de domo sua;

¹⁶et, qui in agro erit, non revertatur retro tollere vestimentum suum.

¹⁷Vae autem praegnantibus et nutrientibus in illis diebus!

¹⁸Orate vero, ut hieme non fiat:

¹⁹erunt enim dies illi tribulatio talis, qualis non fuit ab initio creaturae, quam condidit Deus, usque nunc, neque fiet.

²⁰Et nisi breviasset Dominus dies, non fuisset salva omnis caro. Sed propter electos, quos elegit, breviavit dies.

²¹Et tunc, si quis vobis dixerit: “Ecce hic est Christus, ecce illic”, ne credideritis.

²²Exsurgent enim pseudochristi et pseudoprophetae et dabunt signa et portenta ad seducendos, si potest fieri, electos.

²³Vos autem videte; praedixi vobis omnia.

²⁴Sed in illis diebus post tribulationem illam sol contenebrabitur, et luna non dabit splendorem suum,

²⁵et erunt stellae de caelo decidentes, et virtutes, quae sunt in caelis, movebuntur.

²⁶Et tunc videbunt Filium hominis venientem in nubibus cum virtute multa et gloria.

²⁷Et tunc mittet angelos et congregabit electos suos a quattuor ventis, a summo terrae usque ad summum caeli.

²⁸A ficu autem discite parabolam: cum iam ramus eius tener fuerit et germinaverit folia, cognoscitis quia in proximo sit aestas.

²⁹Sic et vos, cum videritis haec fieri, scitote quod in proximo sit in ostiis.

³⁰Amen dico vobis: Non transiet generatio haec, donec omnia ista fiant.

³¹Caelum et terra transibunt, verba autem mea non transibunt.

³²De die autem illo vel hora nemo scit, neque angeli in caelo neque Filius, nisi Pater.

³³Videte, vigilate; nescitis enim, quando tempus sit.

³⁴Sicut homo, qui peregre profectus reliquit domum suam et dedit servis suis potestatem, unicuique opus suum, ianitori quoque praecepit, ut vigilaret.

³⁵Vigilate ergo; nescitis enim quando dominus domus veniat, sero an media nocte an galli cantu an mane;

³⁶ne, cum venerit repente, inveniat vos dormientes.

³⁷Quod autem vobis dico, omnibus dico: Vigilate! ”.