Read Nova_Vulgata Marcus 7 Bible Online

Marcus 7 - Nova_Vulgata bible

Marcus 7

¹Et conveniunt ad eum pharisaei et quidam de scribis venientes ab Hierosolymis;

²et cum vidissent quosdam ex discipulis eius communibus manibus, id est non lotis, manducare panes

³— pharisaei enim et omnes Iudaei, nisi pugillo lavent manus, non manducant, tenentes traditionem seniorum;

⁴et a foro nisi baptizentur, non comedunt; et alia multa sunt, quae acceperunt servanda: baptismata calicum et urceorum et aeramentorum et lectorum —

⁵et interrogant eum pharisaei et scribae: “ Quare discipuli tui non ambulant iuxta traditionem seniorum, sed communibus manibus manducant panem? ”.

⁶At ille dixit eis: “ Bene prophetavit Isaias de vobis hypocritis, sicut scriptum est: “Populus hic labiis me honorat, cor autem eorum longe est a me;

⁷in vanum autem me colunt docentes doctrinas praecepta hominum”.

⁸Relinquentes mandatum Dei tenetis traditionem hominum ”.

⁹Et dicebat illis: “ Bene irritum facitis praeceptum Dei, ut traditionem vestram servetis.

¹⁰Moyses enim dixit: “Honora patrem tuum et matrem tuam” et: “Qui maledixerit patri aut matri, morte moriatur”;

¹¹vos autem dicitis: “Si dixerit homo patri aut matri: Corban, quod est donum, quodcumque ex me tibi profuerit”,

¹²ultra non permittitis ei facere quidquam patri aut matri

¹³rescindentes verbum Dei per traditionem vestram, quam tradidistis; et similia huiusmodi multa facitis ”.

¹⁴Et advocata iterum turba, dicebat illis: “ Audite me, omnes, et intellegite:

¹⁵Nihil est extra hominem introiens in eum, quod possit eum coinquinare; sed quae de homine procedunt, illa sunt, quae coinquinant hominem! ”.

¹⁷Et cum introisset in domum a turba, interrogabant eum discipuli eius parabolam.

¹⁸Et ait illis: “ Sic et vos imprudentes estis? Non intellegitis quia omne extrinsecus introiens in hominem non potest eum coinquinare,

¹⁹quia non introit in cor eius sed in ventrem et in secessum exit? ”, purgans omnes escas.

²⁰Dicebat autem: “ Quod de homine exit, illud coinquinat hominem;

²¹ab intus enim de corde hominum cogitationes malae procedunt, fornicationes, furta, homicidia,

²²adulteria, avaritiae, nequitiae, dolus, impudicitia, oculus malus, blasphemia, superbia, stultitia:

²³omnia haec mala ab intus procedunt et coinquinant hominem ”.

²⁴Inde autem surgens abiit in fines Tyri et Sidonis. Et ingressus domum neminem voluit scire et non potuit latere.

²⁵Sed statim ut audivit de eo mulier, cuius habebat filia spiritum immundum, veniens procidit ad pedes eius.

²⁶Erat autem mulier Graeca, Syrophoenissa genere. Et rogabat eum, ut daemonium eiceret de filia eius.

²⁷Et dicebat illi: “ Sine prius saturari filios; non est enim bonum sumere panem filiorum et mittere catellis ”.

²⁸At illa respondit et dicit ei: “ Domine, etiam catelli sub mensa comedunt de micis puerorum ”.

²⁹Et ait illi: “ Propter hunc sermonem vade; exiit daemonium de filia tua ”.

³⁰Et cum abisset domum suam, invenit puellam iacentem supra lectum et daemonium exisse.

³¹Et iterum exiens de finibus Tyri venit per Sidonem ad mare Galilaeae inter medios fines Decapoleos.

³²Et adducunt ei surdum et mutum et deprecantur eum, ut imponat illi manum.

³³Et apprehendens eum de turba seorsum misit digitos suos in auriculas eius et exspuens tetigit linguam eius

³⁴et suspiciens in caelum ingemuit et ait illi: “ Effetha ”, quod est: “ Adaperire ”.

³⁵Et statim apertae sunt aures eius, et solutum est vinculum linguae eius, et loquebatur recte.

³⁶Et praecepit illis, ne cui dicerent; quanto autem eis praecipiebat, tanto magis plus praedicabant.

³⁷Et eo amplius admirabantur dicentes: “ Bene omnia fecit, et surdos facit audire et mutos loqui! ”.