Read Nova_Vulgata Lucas 17 Bible Online

Lucas 17 - Nova_Vulgata bible

Lucas 17

¹Et ad discipulos suos ait: “ Impossibile est ut non ve niant scandala; vae autem illi, per quem veniunt!

²Utilius est illi, si lapis molaris imponatur circa collum eius et proiciatur in mare, quam ut scandalizet unum de pusillis istis.

³Attendite vobis! Si peccaverit frater tuus, increpa illum et, si paenitentiam egerit, dimitte illi;

⁴et si septies in die peccaverit in te et septies conversus fuerit ad te dicens: “Paenitet me”, dimittes illi ”.

⁵Et dixerunt apostoli Domino: “ Adauge nobis fidem! ”.

⁶Dixit autem Dominus: “ Si haberetis fidem sicut granum sinapis, diceretis huic arbori moro: “Eradicare et transplantare in mare”, et oboediret vobis.

⁷Quis autem vestrum habens servum arantem aut pascentem, qui regresso de agro dicet illi: “Statim transi, recumbe”,

⁸et non dicet ei: “Para, quod cenem, et praecinge te et ministra mihi, donec manducem et bibam, et post haec tu manducabis et bibes”?

⁹Numquid gratiam habet servo illi, quia fecit, quae praecepta sunt?

¹⁰Sic et vos, cum feceritis omnia, quae praecepta sunt vobis, dicite: “Servi inutiles sumus; quod debuimus facere, fecimus” ”.

¹¹Et factum est, dum iret in Ierusalem, et ipse transibat per mediam Samariam et Galilaeam.

¹²Et cum ingrederetur quoddam castellum, occurrerunt ei decem viri leprosi, qui steterunt a longe

¹³et levaverunt vocem dicentes: “ Iesu praeceptor, miserere nostri! ”.

¹⁴Quos ut vidit, dixit: “ Ite, ostendite vos sacerdotibus ”. Et factum est, dum irent, mundati sunt.

¹⁵Unus autem ex illis, ut vidit quia sanatus est, regressus est cum magna voce magnificans Deum

¹⁶et cecidit in faciem ante pedes eius gratias agens ei; et hic erat Samaritanus.

¹⁷Respondens autem Iesus dixit: “ Nonne decem mundati sunt? Et novem ubi sunt?

¹⁸Non sunt inventi qui redirent, ut darent gloriam Deo, nisi hic alienigena? ”.

¹⁹Et ait illi: “ Surge, vade; fides tua te salvum fecit ”.

²⁰Interrogatus autem a pharisaeis: “ Quando venit regnum Dei? ”, respondit eis et dixit: “ Non venit regnum Dei cum observatione,

²¹neque dicent: “Ecce hic” aut: “Illic”; ecce enim regnum Dei intra vos est ”.

²²Et ait ad discipulos: “ Venient dies, quando desideretis videre unum diem Filii hominis et non videbitis.

²³Et dicent vobis: “Ecce hic”, “Ecce illic”; nolite ire neque sectemini.

²⁴Nam sicut fulgur coruscans de sub caelo in ea, quae sub caelo sunt, fulget, ita erit Filius hominis in die sua.

²⁵Primum autem oportet illum multa pati et reprobari a generatione hac.

²⁶Et sicut factum est in diebus Noe, ita erit et in diebus Filii hominis:

²⁷edebant, bibebant, uxores ducebant, dabantur ad nuptias, usque in diem, qua intravit Noe in arcam, et venit diluvium et perdidit omnes.

²⁸Similiter sicut factum est in diebus Lot: edebant, bibebant, emebant, vendebant, plantabant, aedificabant;

²⁹qua die autem exiit Lot a Sodomis, pluit ignem et sulphur de caelo et omnes perdidit.

³⁰Secundum haec erit, qua die Filius hominis revelabitur.

³¹In illa die, qui fuerit in tecto, et vasa eius in domo, ne descendat tollere illa; et, qui in agro, similiter non redeat retro.

³²Memores estote uxoris Lot.

³³Quicumque quaesierit animam suam salvam facere, perdet illam; et, quicumque perdiderit illam, vivificabit eam.

³⁴Dico vobis: Illa nocte erunt duo in lecto uno: unus assumetur, et alter relinquetur;

³⁵duae erunt molentes in unum: una assumetur, et altera relinquetur ”.

³⁷Respondentes dicunt illi: “ Ubi, Domine? ”. Qui dixit eis: “ Ubicumque fuerit corpus, illuc congregabuntur et aquilae ”.