Read Nova_Vulgata Deuteronomium 22 Bible Online

Deuteronomium 22 - Nova_Vulgata bible

Deuteronomium 22

¹Non videbis bovem fratris tui aut ovem errantem et praeteribis, sed reduces fratri tuo;

²si autem non est prope frater tuus nec nosti eum, duces in domum tuam, et erunt apud te quamdiu quaerat ea frater tuus et recipiat.

³Similiter facies de asino et de vestimento et de omni re fratris tui, quae perierit: si inveneris eam, ne subtrahas te.

⁴Si videris asinum fratris tui aut bovem cecidisse in via, non subtrahes te, sed sublevabis cum eo.

⁵Non induetur mulier veste virili, nec vir utetur veste feminea: abominabilis enim apud Dominum Deum tuum est omnis, qui facit haec.

⁶Si ambulans per viam, in arbore vel in terra nidum avis inveneris et matrem pullis vel ovis desuper incubantem, non sumes eam de filiis,

⁷sed abire patieris matrem tenens filios, ut bene sit tibi, et longo vivas tempore.

⁸Cum aedificaveris domum novam, facies murum tecto tuo per circuitum, ne adducas sanguinem super domum tuam et sis reus, labente aliquo in praeceps ruente.

⁹Non seres vineam tuam altero semine, ne et sementis, quam sevisti, et quae nascuntur ex vinea, pariter sanctificentur.

¹⁰Non arabis in bove simul et asino.

¹¹Non indueris vestimento, quod ex lana linoque contextum est.

¹²Funiculos facies per quattuor angulos pallii tui, quo operieris.

¹³Si duxerit vir uxorem et intraverit ad eam et postea odio habuerit eam

¹⁴imputaveritque ei obiciens ei nomen pessimum et dixerit: “Uxorem hanc accepi et ingressus ad eam non inveni virginem”,

¹⁵tollent pater et mater eius et ferent secum signa virginitatis eius ad seniores urbis, qui in porta sunt,

¹⁶et dicet pater: “Filiam meam dedi huic uxorem, quam, quia odit,

¹⁷imponit ei nomen pessimum, ut dicat: Non inveni filiam tuam virginem; et ecce haec sunt signa virginitatis filiae meae”. Expandent vestimentum coram se nioribus civitatis.

¹⁸Apprehendentque senes urbis illius virum et verberabunt illum

¹⁹condemnantes insuper centum siclis argenti, quos dabunt patri puellae, quoniam diffamavit nomen pessimum super virginem Israel; habebitque eam uxorem et non poterit dimittere eam omnibus diebus vitae suae.

²⁰Quod si verum est, quod obicit, et non est in puella inventa virginitas,

²¹educent eam ad fores domus patris sui, et lapidibus obruent viri civitatis eius, et morietur, quoniam fecit nefas in Israel, ut fornicaretur in domo patris sui; et auferes malum de medio tui.

²²Si inventus fuerit vir dormiens cum uxore alterius, uterque morietur, id est adulter et adultera; et auferes malum de Israel.

²³Si puellam virginem desponsatam viro invenerit aliquis in civitate et concubuerit cum illa,

²⁴educetis utrumque ad portam civitatis illius et lapidibus obruetis, et morientur: puella quia non clamavit, cum esset in civitate, vir quia humiliavit uxorem proximi sui; et auferes malum de medio tui.

²⁵Sin autem in agro reppererit vir puellam, quae desponsata est, et apprehendens concubuerit cum illa, ipse morietur solus;

²⁶puella nihil patietur nec est rea mortis, quoniam sicut vir consurgit contra fratrem suum et occidit eum, ita et puella perpessa est:

²⁷sola erat in agro, clamavit puella desponsata, et nullus affuit, qui liberaret eam.

²⁸Si invenerit vir puellam virginem, quae non habet sponsum, et apprehendens concubuerit cum ea, et res ad iudicium venerit,

²⁹dabit, qui dormivit cum ea, patri puellae quinquaginta siclos argenti et habebit eam uxorem, quia humiliavit illam: non poterit dimittere eam cunctis diebus vitae suae.