Read Nova_Vulgata Deuteronomium 23 Bible Online

Deuteronomium 23 - Nova_Vulgata bible

Deuteronomium 23

¹Non accipiet homo uxorem patris sui nec revelabit operi mentum eius.

²Non intrabit eunuchus, attritis vel amputatis testiculis et absciso veretro, ecclesiam Domini.

³Non ingredietur mamzer in ecclesiam Domini neque decima generatione.

⁴Ammonites et Moabites etiam in decima generatione non intrabunt ecclesiam Domini in aeternum,

⁵quia noluerunt vobis occurrere cum pane et aqua in via, quando egressi estis de Aegypto, et quia conduxerunt contra te Balaam filium Beor de Phethor in Aramnaharaim, ut malediceret tibi;

⁶et noluit Dominus Deus tuus audire Balaam vertitque tibi maledictionem eius in benedictionem, eo quod diligeret te.

⁷Non facies cum eis pacem nec quaeres eis bona cunctis diebus vitae tuae in sempiternum.

⁸Non abominaberis Idumaeum, quia frater tuus est, nec Aegyptium, quia advena fuisti in terra eius:

⁹qui nati fuerint ex eis tertia generatione, intrabunt ecclesiam Domini.

¹⁰Quando egressus fueris adversus hostes tuos in pugnam, custodies te ab omni re mala.

¹¹Si fuerit apud te homo, qui nocturno pollutus sit somnio, egredietur extra castra et non revertetur,

¹²priusquam ad vesperam lavetur aqua; et ad solis occasum regredietur in castra.

¹³Habebis locum extra castra, ad quem egrediaris ad requisita naturae

¹⁴gerens paxillum in balteo; cumque sederis foris, fodies foveam et egesta humo operies.

¹⁵Dominus enim Deus tuus ambulat in medio castrorum tuorum, ut eruat te et tradat tibi inimicos tuos; sint castra tua sancta, et nihil in eis videat foeditatis nec derelinquat te.

¹⁶Non trades servum domino suo, qui ad te confugerit:

¹⁷habitabit tecum in medio tui in loco, quem elegerit in una urbium tuarum, quae placuerit ei, nec contristes eum.

¹⁸Non erit prostibulum sacrum de filiabus Israel, nec scortator sacer de filiis Israel.

¹⁹Non offeres mercedem prostibuli nec pretium canis in domo Domini Dei tui, quidquid illud est, quod voveris, quia abominatio est utrumque apud Dominum Deum tuum.

²⁰Non fenerabis fratri tuo ad usuram pecuniam nec alimenta nec quamlibet aliam rem,

²¹sed alieno fenerabis. Fratri autem tuo absque usura id, quo indiget, commodabis, ut benedicat tibi Dominus Deus tuus in omni opere tuo in terra, ad quam ingredieris possidendam.

²²Cum voveris votum Domino Deo tuo, non tardabis reddere; quia requiret illud Dominus Deus tuus a te, et reputabitur tibi in peccatum.

²³Si nolueris polliceri, absque peccato eris;

²⁴quod autem egressum est de labiis tuis, observabis et facies, sicut promisisti Domino Deo tuo: propria voluntate et ore tuo locutus es.

²⁵Ingressus vineam proximi tui comede uvas, quantum tibi placuerit; in sporta autem ne efferas tecum.

²⁶Si intraveris in segetem amici tui, franges spicas manu; falce autem non metes.