Read Nova_Vulgata Ioannes 7 Bible Online

Ioannes 7 - Nova_Vulgata bible

Ioannes 7

¹Et post haec ambulabat Iesus in Galilaeam; non enim volebat in Iudaeam ambulare, quia quaerebant eum Iudaei interficere.

²Erat autem in proximo dies festus Iudaeorum, Scenopegia.

³Dixerunt ergo ad eum fratres eius: “ Transi hinc et vade in Iudaeam, ut et discipuli tui videant opera tua, quae facis.

⁴Nemo quippe in occulto quid facit et quaerit ipse in palam esse. Si haec facis, manifesta teipsum mundo ”.

⁵Neque enim fratres eius credebant in eum.

⁶Dicit ergo eis Iesus: “ Tempus meum nondum adest, tempus autem vestrum semer est paratum.

⁷Non potest mundus odisse vos; me autem odit, quia ego testimonium perhibeo de illo, quia opera eius mala sunt.

⁸Vos ascendite ad diem festum; ego non ascendo ad diem festum istum, quia meum tempus nondum impletum est ”.

⁹Haec autem cum dixisset, ipse mansit in Galilaea.

¹⁰Ut autem ascenderunt fratres eius ad diem festum, tunc et ipse ascendit, non manifeste sed quasi in occulto.

¹¹Iudaei ergo quaerebant eum in die festo et dicebant: “ Ubi est ille? ”.

¹²Et murmur multus de eo erat in turba. Alii quidem dicebant: “ Bonus est! ”; alii autem dicebant: “ Non, sed seducit turbam! ”.

¹³Nemo tamen palam loquebatur de illo propter metum Iudaeorum.

¹⁴Iam autem die festo mediante, ascendit Iesus in templum et docebat.

¹⁵Mirabantur ergo Iudaei dicentes: “ Quomodo hic litteras scit, cum non didicerit? ”.

¹⁶Respondit ergo eis Iesus et dixit: “ Mea doctrina non est mea sed eius, qui misit me.

¹⁷Si quis voluerit voluntatem eius facere, cognoscet de doctrina utrum ex Deo sit, an ego a meipso loquar.

¹⁸Qui a semetipso loquitur, gloriam propriam quaerit; qui autem quaerit gloriam eius, qui misit illum, hic verax est, et iniustitia in illo non est.

¹⁹Nonne Moyses dedit vobis legem? Et nemo ex vobis facit legem. Quid me quaeritis interficere? ”.

²⁰Respondit turba: “ Daemonium habes! Quis te quaerit interficere? ”.

²¹Respondit Iesus et dixit eis: “ Unum opus feci, et omnes miramini.

²²Propterea Moyses dedit vobis circumcisionem — non quia ex Moyse est sed ex patribus — et in sabbato circumciditis hominem.

²³Si circumcisionem accipit homo in sabbato, ut non solvatur lex Moysis, mihi indignamini, quia totum hominem sanum feci in sabbato?

²⁴Nolite iudicare secundum faciem, sed iustum iudicium iudicate ”.

²⁵Dicebant ergo quidam ex Hierosolymitis: “ Nonne hic est, quem quaerunt interficere?

²⁶Et ecce palam loquitur, et nihil ei dicunt. Numquid vere cognoverunt principes quia hic est Christus?

²⁷Sed hunc scimus unde sit, Christus autem cum venerit, nemo scit unde sit ”.

²⁸Clamavit ergo docens in templo Iesus et dicens: “ Et me scitis et unde sim scitis. Et a meipso non veni, sed est verus, qui misit me, quem vos non scitis.

²⁹Ego scio eum, quia ab ipso sum, et ipse me misit ”.

³⁰Quaerebant ergo eum apprehendere, et nemo misit in illum manus, quia nondum venerat hora eius.

³¹De turba autem multi crediderunt in eum et dicebant: “ Christus cum venerit, numquid plura signa faciet quam quae hic fecit? ”.

³²Audierunt pharisaei turbam murmurantem de illo haec et miserunt pontifices et pharisaei ministros, ut apprehenderent eum.

³³Dixit ergo Iesus: “ Adhuc modicum tempus vobiscum sum et vado ad eum, qui misit me.

³⁴Quaeretis me et non invenietis; et ubi sum ego, vos non potestis venire ”.

³⁵Dixerunt ergo Iudaei ad seipsos: “ Quo hic iturus est, quia nos non inveniemus eum? Numquid in dispersionem Graecorum iturus est et docturus Graecos?

³⁶Quis est hic sermo, quem dixit: “Quaeretis me et non invenietis” et: “Ubi sum ego, vos non potestis venire”? ”.

³⁷In novissimo autem die magno festivitatis stabat Iesus et clamavit dicens: “ Si quis sitit, veniat ad me et bibat,

³⁸qui credit in me. Sicut dixit Scriptura, flumina de ventre eius fluent aquae vivae ”.

³⁹Hoc autem dixit de Spiritu, quem accepturi erant qui crediderant in eum. Nondum enim erat Spiritus, quia Iesus nondum fuerat glorificatus.

⁴⁰Ex illa ergo turba, cum audissent hos sermones, dicebant: “ Hic est vere propheta! ”;

⁴¹alii dicebant: “ Hic est Christus! ”; quidam autem dicebant: “ Numquid a Galilaea Christus venit?

⁴²Nonne Scriptura dixit: “Ex semine David et de Bethlehem castello, ubi erat David, venit Christus”? ”.

⁴³Dissensio itaque facta est in turba propter eum.

⁴⁴Quidam autem ex ipsis volebant apprehendere eum, sed nemo misit super illum manus.

⁴⁵Venerunt ergo ministri ad pontifices et pharisaeos; et dixerunt eis illi: “ Quare non adduxistis eum? ”.

⁴⁶Responderunt ministri: “ Numquam sic locutus est homo ”.

⁴⁷Responderunt ergo eis pharisaei: “ Numquid et vos seducti estis?

⁴⁸Numquid aliquis ex principibus credidit in eum aut ex pharisaeis?

⁴⁹Sed turba haec, quae non novit legem, maledicti sunt! ”.

⁵⁰Dicit Nicodemus ad eos, ille qui venit ad eum antea, qui unus erat ex ipsis:

⁵¹“ Numquid lex nostra iudicat hominem, nisi audierit ab ipso prius et cognoverit quid faciat? ”.

⁵²Responderunt et dixerunt ei: “ Numquid et tu ex Galilaea es? Scrutare et vide quia propheta a Galilaea non surgit! ”.

⁵³Et reversi sunt unusquisque in domum suam.