Read Nova_Vulgata Actus Apostolorum 2 Bible Online

Actus Apostolorum 2 - Nova_Vulgata bible

Actus Apostolorum 2

¹Et cum compleretur dies Pen tecostes, erant omnes pariter in eodem loco.

²Et factus est repente de caelo sonus tamquam advenientis spiritus vehementis et replevit totam domum, ubi erant sedentes.

³Et apparuerunt illis dispertitae linguae tamquam ignis, seditque supra singulos eorum;

⁴et repleti sunt omnes Spiritu Sancto et coeperunt loqui aliis linguis, prout Spiritus dabat eloqui illis.

⁵Erant autem in Ierusalem habitantes Iudaei, viri religiosi ex omni natione, quae sub caelo est;

⁶facta autem hac voce, convenit multitudo et confusa est, quoniam audiebat unusquisque lingua sua illos loquentes.

⁷Stupebant autem et mirabantur dicentes: “ Nonne ecce omnes isti, qui loquuntur, Galilaei sunt?

⁸Et quomodo nos audimus unusquisque propria lingua nostra, in qua nati sumus?

⁹Parthi et Medi et Elamitae et qui habitant Mesopotamiam, Iudaeam quoque et Cappadociam, Pontum et Asiam,

¹⁰Phrygiam quoque et Pamphyliam, Aegyptum et partes Libyae, quae est circa Cyrenem, et advenae Romani,

¹¹Iudaei quoque et proselyti, Cretes et Arabes, audimus loquentes eos nostris linguis magnalia Dei ”.

¹²Stupebant autem omnes et haesitabant ad invicem dicentes: “ Quidnam hoc vult esse? ”;

¹³alii autem irridentes dicebant: “ Musto pleni sunt isti ”.

¹⁴Stans autem Petrus cum Undecim levavit vocem suam et locutus est eis: “ Viri Iudaei et qui habitatis Ierusalem universi, hoc vobis notum sit, et auribus percipite verba mea.

¹⁵Non enim, sicut vos aestimatis, hi ebrii sunt, est enim hora diei tertia;

¹⁶sed hoc est, quod dictum est per prophetam Ioel:

¹⁷“Et erit: in novissimis diebus, dicit Deus, effundam de Spiritu meo super omnem carnem, et prophetabunt filii vestri et filiae vestrae, et iuvenes vestri visiones videbunt, et seniores vestri somnia somniabunt;

¹⁸et quidem super servos meos et super ancillas meas in diebus illis effundam de Spiritu meo, et prophetabunt.

¹⁹Et dabo prodigia in caelo sursum et signa in terra deorsum, sanguinem et ignem et vaporem fumi;

²⁰sol convertetur in tenebras, et luna in sanguinem, antequam veniat dies Domini magnus et manifestus.

²¹Et erit: omnis quicumque invocaverit nomen Domini, salvus erit”.

²²Viri Israelitae, audite verba haec: Iesum Nazarenum, virum approbatum a Deo apud vos virtutibus et prodigiis et signis, quae fecit per illum Deus in medio vestri, sicut ipsi scitis,

²³hunc definito consilio et praescientia Dei traditum per manum iniquorum affigentes interemistis,

²⁴quem Deus suscitavit, solutis doloribus mortis, iuxta quod impossibile erat teneri illum ab ea.

²⁵David enim dicit circa eum: “Providebam Dominum coram me semper, quoniam a dextris meis est, ne commovear.

²⁶Propter hoc laetatum est cor meum, et exsultavit lingua mea; insuper et caro mea requiescet in spe.

²⁷Quoniam non derelinques animam meam in inferno neque dabis Sanctum tuum videre corruptionem.

²⁸Notas fecisti mihi vias vitae, replebis me iucunditate cum facie tua”.

²⁹Viri fratres, liceat audenter dicere ad vos de patriarcha David, quoniam et defunctus est et sepultus est, et sepulcrum eius est apud nos usque in hodiernum diem;

³⁰propheta igitur cum esset et sciret quia iure iurando iurasset illi Deus de fructu lumbi eius sedere super sedem eius,

³¹providens locutus est de resurrectione Christi, quia neque derelictus est in inferno, neque caro eius vidit corruptionem.

³²Hunc Iesum resuscitavit Deus, cuius omnes nos testes sumus.

³³Dextera igitur Dei exaltatus, et promissione Spiritus Sancti accepta a Patre, effudit hunc, quem vos videtis et auditis.

³⁴Non enim David ascendit in caelos; dicit autem ipse: “Dixit Dominus Domino meo: Sede a dextris meis,

³⁵donec ponam inimicos tuos scabellum pedum tuorum”.

³⁶Certissime ergo sciat omnis domus Israel quia et Dominum eum et Christum Deus fecit, hunc Iesum, quem vos crucifixistis ”.

³⁷His auditis, compuncti sunt corde et dixerunt ad Petrum et reliquos apostolos: “ Quid faciemus, viri fratres? ”.

³⁸Petrus vero ad illos: “ Paenitentiam, inquit, agite, et baptizetur unusquisque vestrum in nomine Iesu Christi in remissionem peccatorum vestrorum, et accipietis donum Sancti Spiritus;

³⁹vobis enim est repromissio et filiis vestris et omnibus, qui longe sunt, quoscumque advocaverit Dominus Deus noster ”.

⁴⁰Aliis etiam verbis pluribus testificatus est et exhortabatur eos dicens: “ Salvamini a generatione ista prava ”.

⁴¹Qui ergo, recepto sermone eius, baptizati sunt; et appositae sunt in il la die animae circiter tria milia.

⁴²Erant autem perseverantes in doctrina apostolorum et communicatione, in fractione panis et orationibus.

⁴³Fiebat autem omni animae timor; multa quoque prodigia et signa per apostolos fiebant.

⁴⁴Omnes autem, qui crediderant, erant pariter et habebant omnia communia;

⁴⁵et possessiones et substantias vendebant et dividebant illas omnibus, prout cuique opus erat;

⁴⁶cotidie quoque perdurantes unanimiter in templo et frangentes circa domos panem, sumebant cibum cum exsultatione et simplicitate cordis,

⁴⁷collaudantes Deum et habentes gratiam ad omnem plebem. Dominus autem augebat, qui salvi fierent cotidie in idipsum.