Read Nova_Vulgata ad Corinthios I 12 Bible Online

ad Corinthios I 12 - Nova_Vulgata bible

ad Corinthios I 12

¹De spiritalibus autem, fra tres, nolo vos ignorare.

²Scitis quoniam, cum gentes essetis, ad simulacra muta, prout ducebamini, euntes.

³Ideo notum vobis facio quod nemo in Spiritu Dei loquens dicit: “ Anathema Iesus! ”; et nemo potest dicere: “ Dominus Iesus ”, nisi in Spiritu Sancto.

⁴Divisiones vero gratiarum sunt, idem autem Spiritus;

⁵et divisiones ministrationum sunt, idem autem Dominus;

⁶et divisiones operationum sunt, idem vero Deus, qui operatur omnia in omnibus.

⁷Unicuique autem datur manifestatio Spiritus ad utilitatem.

⁸Alii quidem per Spiritum datur sermo sapientiae, alii autem sermo scientiae secundum eundem Spiritum,

⁹alteri fides in eodem Spiritu, alii donationes sanitatum in uno Spiritu,

¹⁰alii operationes virtutum, alii prophetatio, alii discretio spirituum, alii genera linguarum, alii interpretatio linguarum;

¹¹haec autem omnia operatur unus et idem Spiritus, dividens singulis prout vult.

¹²Sicut enim corpus unum est et membra habet multa, omnia autem membra corporis, cum sint multa, unum corpus sunt, ita et Christus;

¹³etenim in uno Spiritu omnes nos in unum corpus baptizati sumus, sive Iudaei sive Graeci sive servi sive liberi, et omnes unum Spiritum potati sumus.

¹⁴Nam et corpus non est unum membrum sed multa.

¹⁵Si dixerit pes: “Non sum manus, non sum de corpore ”, non ideo non est de corpore;

¹⁶et si dixerit auris: “ Non sum oculus, non sum de corpore ”, non ideo non est de corpore.

¹⁷Si totum corpus oculus est, ubi auditus? Si totum auditus, ubi odoratus?

¹⁸Nunc autem posuit Deus membra, unumquodque eorum in corpore, sicut voluit.

¹⁹Quod si essent omnia unum membrum, ubi corpus?

²⁰Nunc autem multa quidem membra, unum autem corpus.

²¹Non potest dicere oculus manui: “ Non es mihi necessaria! ”; aut iterum caput pedibus: “ Non estis mihi necessarii! ”.

²²Sed multo magis, quae videntur membra corporis infirmiora esse, necessaria sunt;

²³et, quae putamus ignobiliora membra esse corporis, his honorem abundantiorem circumdamus; et, quae inhonesta sunt nostra, abundantiorem honestatem habent,

²⁴honesta autem nostra nullius egent. Sed Deus temperavit corpus, ei, cui deerat, abundantiorem tribuendo honorem,

²⁵ut non sit schisma in corpore, sed idipsum pro invicem sollicita sint membra.

²⁶Et sive patitur unum membrum, compatiuntur omnia membra; sive glorificatur unum membrum, congaudent omnia membra.

²⁷Vos autem estis corpus Christi et membra ex parte.

²⁸Et quosdam quidem posuit Deus in ecclesia primum apostolos, secundo prophetas, tertio doctores, deinde virtutes, exinde donationes curationum, opitulationes, gubernationes, genera linguarum.

²⁹Numquid omnes apostoli? Numquid omnes prophetae? Numquid omnes doctores? Numquid omnes virtutes?

³⁰Numquid omnes donationes habent curationum? Numquid omnes linguis loquuntur? Numquid omnes interpretantur?

³¹Aemulamini autem charismata maiora. Et adhuc excellentiorem viam vobis demonstro.