Read Nova_Vulgata ad Galatas 5 Bible Online

ad Galatas 5 - Nova_Vulgata bible

ad Galatas 5

¹Hac libertate nos Christus liberavit; state igitur et nolite iterum iugo servitutis detineri.

²Ecce ego Paulus dico vobis quoniam, si circumcidamini, Christus vobis nihil proderit.

³Testificor autem rursum omni homini circumcidenti se quoniam debitor est universae legis faciendae.

⁴Evacuati estis a Christo, qui in lege iustificamini, a gratia excidistis.

⁵Nos enim Spiritu ex fide spem iustitiae exspectamus.

⁶Nam in Christo Iesu neque circumcisio aliquid valet neque praeputium, sed fides, quae per caritatem operatur.

⁷Currebatis bene; quis vos impedivit veritati non oboedire?

⁸Haec persuasio non est ex eo, qui vocat vos.

⁹Modicum fermentum totam massam corrumpit.

¹⁰Ego confido in vobis in Domino, quod nihil aliud sapietis; qui autem conturbat vos, portabit iudicium, quicumque est ille.

¹¹Ego autem, fratres, si circumcisionem adhuc praedico, quid adhuc persecutionem patior? Ergo evacuatum est scandalum crucis.

¹²Utinam et abscidantur, qui vos conturbant!

¹³Vos enim in libertatem vocati estis, fratres; tantum ne libertatem in occasionem detis carni, sed per caritatem servite invicem.

¹⁴Omnis enim lex in uno sermone impletur, in hoc: Diliges proximum tuum sicut teipsum.

¹⁵Quod si invicem mordetis et devoratis, videte, ne ab invicem consumamini!

¹⁶Dico autem: Spiritu ambulate et concupiscentiam carnis ne perfeceritis.

¹⁷Caro enim concupiscit adversus Spiritum, Spiritus autem adversus carnem; haec enim invicem adversantur, ut non, quaecumque vultis, illa faciatis.

¹⁸Quod si Spiritu ducimini, non estis sub lege.

¹⁹Manifesta autem sunt opera carnis, quae sunt fornicatio, immunditia, luxuria,

²⁰idolorum servitus, veneficia, inimicitiae, contentiones, aemulationes, irae, rixae, dissensiones, sectae,

²¹invidiae, ebrietates, comissationes et his similia; quae praedico vobis, sicut praedixi, quoniam, qui talia agunt, regnum Dei non consequentur.

²²Fructus autem Spiritus est caritas, gaudium, pax, longanimitas, benignitas, bonitas, fides,

²³mansuetudo, continentia; adversus huiusmodi non est lex.

²⁴Qui autem sunt Christi Iesu, carnem crucifixerunt cum vitiis et concupiscentiis.

²⁵Si vivimus Spiritu, Spiritu et ambulemus.

²⁶Non efficiamur inanis gloriae cupidi, invicem provocantes, invicem invidentes.