Read Nova_Vulgata ad Ephesios 4 Bible Online

ad Ephesios 4 - Nova_Vulgata bible

ad Ephesios 4

¹Obsecro itaque vos ego, vinctus in Domino, ut digne ambuletis vocatione, qua vocati estis,

²cum omni humilitate et mansuetudine, cum longanimitate, supportantes invicem in caritate,

³solliciti servare unitatem spiritus in vinculo pacis;

⁴unum corpus et unus Spiritus, sicut et vocati estis in una spe vocationis vestrae;

⁵unus Dominus, una fides, unum baptisma;

⁶unus Deus et Pater omnium, qui super omnes et per omnia et in omnibus.

⁷Unicuique autem nostrum data est gratia secundum mensuram donationis Christi.

⁸Propter quod dicit: “ Ascendens in altum captivam duxit captivitatem, dedit dona hominibus ”.

⁹Illud autem “ ascendit ” quid est, nisi quia et descendit in inferiores partes terrae?

¹⁰Qui descendit, ipse est et qui ascendit super omnes caelos, ut impleret omnia.

¹¹Et ipse dedit quosdam quidem apostolos, quosdam autem prophetas, alios vero evangelistas, alios autem pastores et doctores

¹²ad instructionem sanctorum in opus ministerii, in aedificationem corporis Christi,

¹³donec occurramus omnes in unitatem fidei et agnitionis Filii Dei, in virum perfectum, in mensuram aetatis plenitudinis Christi,

¹⁴ut iam non simus parvuli fluctuantes et circumacti omni vento doctrinae in fallacia hominum, in astutia ad circumventionem erroris;

¹⁵veritatem autem facientes in caritate crescamus in illum per omnia, qui est caput Christus,

¹⁶ex quo totum corpus compactum et conexum per omnem iuncturam subministrationis secundum operationem in mensura uniuscuiusque partis augmentum corporis facit in aedificationem sui in caritate.

¹⁷Hoc igitur dico et testificor in Domino, ut iam non ambuletis, sicut et gentes ambulant in vanitate sensus sui

¹⁸tenebris obscuratum habentes intellectum, alienati a vita Dei propter ignorantiam, quae est in illis propter caecitatem cordis ipsorum;

¹⁹qui indolentes semetipsos tradiderunt impudicitiae in operationem immunditiae omnis in avaritia.

²⁰Vos autem non ita didicistis Christum,

²¹si tamen illum audistis et in ipso edocti estis, sicut est veritas in Iesu:

²²deponere vos secundum pristinam conversationem veterem hominem, qui corrumpitur secundum desideria erroris,

²³renovari autem spiritu mentis vestrae

²⁴et induere novum hominem, qui secundum Deum creatus est in iustitia et sanctitate veritatis.

²⁵Propter quod deponentes mendacium loquimini veritatem unusquisque cum proximo suo, quoniam sumus invicem membra.

²⁶Irascimini et nolite peccare; sol non occidat super iracundiam vestram,

²⁷et nolite locum dare Diabolo.

²⁸Qui furabatur, iam non furetur, magis autem laboret operando manibus bonum, ut habeat unde tribuat necessitatem patienti.

²⁹Omnis sermo malus ex ore vestro non procedat, sed si quis bonus ad aedificationem opportunitatis, ut det gratiam audientibus.

³⁰Et nolite contristare Spiritum Sanctum Dei, in quo signati estis in diem redemptionis.

³¹Omnis amaritudo et ira et indignatio et clamor et blasphemia tollatur a vobis cum omni malitia.

³²Estote autem invicem benigni, misericordes, donantes invicem, sicut et Deus in Christo donavit vobis.