Read Nova_Vulgata ad Philippenses 1 Bible Online

ad Philippenses 1 - Nova_Vulgata bible

ad Philippenses 1

¹Paulus et Timotheus servi Christi Iesu omnibus sanctis in Christo Iesu, qui sunt Philippis, cum episcopis et diaconis:

²gratia vobis et pax a Deo Patre nostro et Domino Iesu Christo.

³Gratias ago Deo meo in omni memoria vestri,

⁴semper in omni oratione mea pro omnibus vobis cum gaudio deprecationem faciens

⁵super communione vestra in evangelio a prima die usque nunc;

⁶confidens hoc ipsum, quia, qui coepit in vobis opus bonum, perficiet usque in diem Christi Iesu;

⁷sicut est mihi iustum hoc sentire pro omnibus vobis, eo quod habeam in corde vos et in vinculis meis et in defensione et confirmatione evangelii socios gratiae meae omnes vos esse.

⁸Testis enim mihi Deus, quomodo cupiam omnes vos in visceribus Christi Iesu.

⁹Et hoc oro, ut caritas vestra magis ac magis abundet in scientia et omni sensu,

¹⁰ut probetis potiora, ut sitis sinceri et sine offensa in diem Christi,

¹¹repleti fructu iustitiae, qui est per Iesum Christum, in gloriam et laudem Dei.

¹²Scire autem vos volo, fratres, quia, quae circa me sunt, magis ad profectum venerunt evangelii,

¹³ita ut vincula mea manifesta fierent in Christo in omni praetorio et in ceteris omnibus;

¹⁴et plures e fratribus in Domino confidentes vinculis meis, abundantius audere sine timore verbum loqui.

¹⁵Quidam quidem et propter invidiam et contentionem, quidam autem et propter bonam voluntatem Christum praedicant;

¹⁶hi quidem ex caritate scientes quoniam in defensionem evangelii positus sum,

¹⁷illi autem ex contentione Christum annuntiant, non sincere, existimantes pressuram se suscitare vinculis meis.

¹⁸Quid enim? Dum omni modo, sive sub obtentu sive in veritate, Christus annuntietur, et in hoc gaudeo; sed et gaudebo,

¹⁹scio enim quia hoc mihi proveniet in salutem per vestram orationem et subministrationem Spiritus Iesu Christi,

²⁰secundum exspectationem et spem meam quia in nullo confundar, sed in omni fiducia, sicut semper et nunc, magnificabitur Christus in corpore meo, sive per vitam sive per mortem.

²¹Mihi enim vivere Christus est et mori lucrum.

²²Quod si vivere in carne, hic mihi fructus operis est, et quid eligam ignoro.

²³Coartor autem ex his duobus: desiderium habens dissolvi et cum Christo esse, multo magis melius;

²⁴permanere autem in carne, magis necessarium est propter vos.

²⁵Et hoc confidens, scio quia manebo et permanebo omnibus vobis ad profectum vestrum et gaudium fidei,

²⁶ut gloriatio vestra abundet in Christo Iesu in me, per meum adventum iterum ad vos.

²⁷Tantum digne evangelio Christi conversamini, ut sive cum venero et videro vos, sive absens audiam de vobis quia statis in uno Spiritu unanimes, concertantes fide evangelii;

²⁸et in nullo perterriti ab adversariis, quod est illis indicium perditionis, vobis autem salutis, et hoc a Deo;

²⁹quia vobis hoc donatum est pro Christo, non solum ut in eum credatis, sed ut etiam pro illo patiamini

³⁰idem certamen habentes, quale vidistis in me et nunc auditis in me.