Read Nova_Vulgata ad Timotheum I 4 Bible Online

ad Timotheum I 4 - Nova_Vulgata bible

ad Timotheum I 4

¹Spiritus autem manifeste dicit, quia in novissimis temporibus discedent quidam a fide, attendentes spiritibus seductoribus et doctrinis daemoniorum,

²in hypocrisi loquentium mendacium et cauteriatam habentium suam conscientiam,

³prohibentium nubere, abstinere a cibis, quos Deus creavit ad percipiendum cum gratiarum actione fidelibus et his, qui cognoverunt veritatem.

⁴Quia omnis creatura Dei bona, et nihil reiciendum, quod cum gratiarum actione percipitur;

⁵sanctificatur enim per verbum Dei et orationem.

⁶Haec proponens fratribus bonus eris minister Christi Iesu, enutritus verbis fidei et bonae doctrinae, quam assecutus es;

⁷profanas autem et aniles fabulas devita. Exerce teipsum ad pietatem;

⁸nam corporalis exercitatio ad modicum utilis est, pietas autem ad omnia utilis est promissionem habens vitae, quae nunc est, et futurae.

⁹Fidelis sermo et omni acceptione dignus:

¹⁰in hoc enim laboramus et certamus, quia sperantes sumus in Deum vivum, qui est salvator omnium hominum, maxime fidelium.

¹¹Praecipe haec et doce.

¹²Nemo adulescentiam tuam contemnat; sed exemplum esto fidelium in verbo, in conversatione, in caritate, in fide, in castitate.

¹³Dum venio, attende lectioni, exhortationi, doctrinae.

¹⁴Noli neglegere donationem, quae in te est, quae data est tibi per prophetiam cum impositione manuum presbyterii.

¹⁵Haec meditare, in his esto, ut profectus tuus manifestus sit omnibus.

¹⁶Attende tibi et doctrinae; insta in illis; hoc enim faciens et teipsum salvum facies et eos, qui te audiunt.