Read Nova_Vulgata ad Titum 2 Bible Online

ad Titum 2 - Nova_Vulgata bible

ad Titum 2

¹Tu autem loquere, quae decent sanam doctrinam.

²Senes, ut sobrii sint, pudici, prudentes, sani fide, dilectione, patientia.

³Anus similiter in habitu sanctae, non criminatrices, non vino multo deditae, bene docentes,

⁴ut prudentiam doceant adulescentulas, ut viros suos ament, filios diligant,

⁵prudentes sint, castae, domus curam habentes, benignae, subditae suis viris, ut non blasphemetur verbum Dei.

⁶Iuvenes similiter hortare, ut sobrii sint.

⁷In omnibus teipsum praebens exemplum bonorum operum, in doctrina integritatem, gravitatem,

⁸in verbo sano irreprehensibilem, ut is, qui ex adverso est, vereatur, nihil habens malum dicere de nobis.

⁹Servos dominis suis subditos esse in omnibus, placentes esse, non contradicentes,

¹⁰non fraudantes, sed omnem fidem bonam ostendentes, ut doctrinam salutaris nostri Dei ornent in omnibus.

¹¹Apparuit enim gratia Dei salutaris omnibus hominibus

¹²erudiens nos, ut abnegantes impietatem et saecularia desideria sobrie et iuste et pie vivamus in hoc saeculo,

¹³exspectantes beatam spem et adventum gloriae magni Dei et salvatoris nostri Iesu Christi;

¹⁴qui dedit semetipsum pro nobis, ut nos redimeret ab omni iniquitate et mundaret sibi populum peculiarem, sectatorem bonorum operum.

¹⁵Haec loquere et exhortare et argue cum omni imperio. Nemo te contemnat!