Read Nova_Vulgata ad Hebraeos 7 Bible Online

ad Hebraeos 7 - Nova_Vulgata bible

ad Hebraeos 7

¹Hic enim Melchisedech, rex Salem, sacerdos Dei summi, qui ob viavit Abrahae regresso a caede regum et benedixit ei,

²cui et decimam omnium divisit Abraham, primum quidem, qui interpretatur rex iustitiae, deinde autem et rex Salem, quod est rex Pacis,

³sine patre, sine matre, sine genealogia, neque initium dierum neque finem vitae habens, assimilatus autem Filio Dei, manet sacerdos in perpetuum.

⁴Intuemini autem quantus sit hic, cui et decimam dedit de praecipuis Abraham patriarcha.

⁵Et illi quidem, qui de filiis Levi sacerdotium accipiunt, mandatum habent decimas sumere a populo secundum legem, id est a fratribus suis, quamquam et ipsi exierunt de lumbis Abrahae;

⁶hic autem, cuius generatio non annumeratur in eis, decimam sumpsit ab Abraham et eum, qui habebat repromissiones, benedixit.

⁷Sine ulla autem contradictione, quod minus est, a meliore benedicitur.

⁸Et hic quidem decimas morientes homines sumunt; ibi autem testimonium accipiens quia vivit.

⁹Et, ut ita dictum sit, per Abraham et Levi, qui decimas accipit, decimatus est;

¹⁰adhuc enim in lumbis patris erat, quando obviavit ei Melchisedech.

¹¹Si ergo consummatio per sacerdotium leviticum erat, populus enim sub ipso legem accepit, quid adhuc necessarium secundum ordinem Melchisedech alium surgere sacerdotem et non secundum ordinem Aaron dici?

¹²Translato enim sacerdotio, necesse est, ut et legis translatio fiat.

¹³De quo enim haec dicuntur, ex alia tribu est, ex qua nullus altari praesto fuit;

¹⁴manifestum enim quod ex Iuda ortus sit Dominus noster, in quam tribum nihil de sacerdotibus Moyses locutus est.

¹⁵Et amplius adhuc manifestum est, si secundum similitudinem Melchisedech exsurgit alius sacerdos,

¹⁶qui non secundum legem mandati carnalis factus est sed secundum virtutem vitae insolubilis,

¹⁷testimonium enim accipit: “ Tu es sacerdos in aeternum secundum ordinem Melchisedech ”.

¹⁸Reprobatio quidem fit praecedentis mandati propter infirmitatem eius et inutilitatem,

¹⁹nihil enim ad perfectum adduxit lex; introductio vero melioris spei, per quam proximamus ad Deum.

²⁰Et quantum non est sine iure iurando; illi quidem sine iure iurando sacerdotes facti sunt,

²¹hic autem cum iure iurando per eum, qui dicit ad illum: “ Iuravit Dominus et non paenitebit eum: Tu es sacerdos in aeternum ”,

²²in tantum et melioris testamenti sponsor factus est Iesus.

²³Et illi quidem plures facti sunt sacerdotes, idcirco quod morte prohibebantur permanere;

²⁴hic autem eo quod manet in aeternum, intransgressibile habet sacerdotium;

²⁵unde et salvare in perpetuum potest accedentes per semetipsum ad Deum, semper vivens ad interpellandum pro eis.

²⁶Talis enim et decebat ut nobis esset pontifex, sanctus, innocens, impollutus, segregatus a peccatoribus et excelsior caelis factus;

²⁷qui non habet necessitatem cotidie, quemadmodum pontifices, prius pro suis delictis hostias offerre, deinde pro populi; hoc enim fecit semel semetipsum offerendo.

²⁸Lex enim homines constituit pontifices infirmitatem habentes; sermo autem iuris iurandi, quod post legem est, Filium in aeternum consummatum.