Read Nova_Vulgata ad Hebraeos 8 Bible Online

ad Hebraeos 8 - Nova_Vulgata bible

ad Hebraeos 8

¹Caput autem super ea, quae dicuntur: talem habemus ponti ficem, qui consedit in dextera throni Maiestatis in caelis,

²sanctorum minister et tabernaculi veri, quod fixit Dominus, non homo.

³Omnis enim pontifex ad offerenda munera et hostias constituitur; unde necesse erat et hunc habere aliquid, quod offerret.

⁴Si ergo esset super terram, nec esset sacerdos, cum sint qui offerant secundum legem munera;

⁵qui figurae et umbrae deserviunt caelestium, sicut responsum est Moysi, cum consummaturus esset tabernaculum: “ Vide enim, inquit, omnia facies secundum exemplar, quod tibi ostensum est in monte ”.

⁶Nunc autem differentius sortitus est ministerium, quanto et melioris testamenti mediator est, quod in melioribus repromissionibus sancitum est.

⁷Nam si illud prius culpa vacasset, non secundi locus inquireretur;

⁸vituperans enim eos dicit: “ Ecce dies veniunt, dicit Dominus, et consummabo super domum Israel et super domum Iudae testamentum novum;

⁹non secundum testamentum, quod feci patribus eorum in die, qua apprehendi manum illorum, ut educerem illos de terra Aegypti; quoniam ipsi non permanserunt in testamento meo, et ego neglexi eos, dicit Dominus.

¹⁰Quia hoc est testamentum, quod testabor domui Israel post dies illos, dicit Dominus, dando leges meas in mentem eorum, et in corde eorum superscribam eas; et ero eis in Deum, et ipsi erunt mihi in populum.

¹¹Et non docebit unusquisque civem suum, et unusquisque fratrem suum dicens: “Cognosce Dominum”; quoniam omnes scient me, a minore usque ad maiorem eorum,

¹²quia propitius ero iniquitatibus eorum et peccatorum illorum iam non memorabor ”.

¹³Dicendo “ novum ” veteravit prius; quod autem antiquatur et senescit, prope interitum est.