Read Nova_Vulgata Petri I 4 Bible Online

Petri I 4 - Nova_Vulgata bible

Petri I 4

¹Christo igitur passo in carne, et vos eadem cogitatione armami ni, quia, qui passus est carne, desiit a peccato;

²ut iam non hominum concupiscentiis sed voluntate Dei, quod reliquum est in carne vivat temporis.

³Sufficit enim praeteritum tempus ad voluntatem gentium consummandam, vobis, qui ambulastis in luxuriis, concupiscentiis, vinolentiis, comissationibus, potationibus et illicitis idolorum cultibus.

⁴In quo mirantur non concurrentibus vobis in eandem luxuriae effusionem, blasphemantes;

⁵qui reddent rationem ei, qui paratus est iudicare vivos et mortuos.

⁶Propter hoc enim et mortuis evangelizatum est, ut iudicentur quidem secundum homines carne, vivant autem secundum Deum Spiritu.

⁷Omnium autem finis appropinquavit. Estote itaque prudentes et vigilate in orationibus.

⁸Ante omnia mutuam in vosmetipsos caritatem continuam habentes, quia caritas operit multitudinem peccatorum;

⁹hospitales invicem sine murmuratione;

¹⁰unusquisque, sicut accepit donationem, in alterutrum illam administrantes, sicut boni dispensatores multiformis gratiae Dei.

¹¹Si quis loquitur, quasi sermones Dei; si quis ministrat, tamquam ex virtute, quam largitur Deus, ut in omnibus glorificetur Deus per Iesum Christum: cui est gloria et imperium in saecula saeculorum. Amen.

¹²Carissimi, nolite mirari in fervore, qui ad tentationem vobis fit, quasi novi aliquid vobis contingat,

¹³sed, quemadmodum communicatis Christi passionibus, gaudete, ut et in revelatione gloriae eius gaudeatis exsultantes.

¹⁴Si exprobramini in nomine Christi, beati, quoniam Spiritus gloriae et Dei super vos requiescit.

¹⁵Nemo enim vestrum patiatur quasi homicida aut fur aut maleficus aut alienorum speculator;

¹⁶si autem ut christianus, non erubescat, glorificet autem Deum in isto nomine.

¹⁷Quoniam tempus est, ut incipiat iudicium a domo Dei; si autem primum a nobis, qui finis eorum, qui non credunt Dei evangelio?

¹⁸“ Et si iustus vix salvatur, impius et peccator ubi parebit? ”.

¹⁹Itaque et hi, qui patiuntur secundum voluntatem Dei, fideli Creatori commendent animas suas in benefacto.