Read Nova_Vulgata Ioannis III 1 Bible Online

Ioannis III 1 - Nova_Vulgata bible

Ioannis III 1

¹Presbyter Gaio carissimo, quem ego diligo in veritate.

²Carissime, in omnibus exopto prospere te agere et valere, sicut prospere agit anima tua.

³Nam gavisus sum valde, venientibus fratribus et testimonium perhibentibus veritati tuae, quomodo tu in veritate ambules.

⁴Maius horum non habeo gaudium, quam ut audiam filios meos in veritate ambulare.

⁵Carissime, fideliter facis, quidquid operaris in fratres et hoc in peregrinos,

⁶qui testimonium reddiderunt caritati tuae in conspectu ecclesiae. Bene facies subveniens illis in via digne Deo;

⁷pro nomine enim profecti sunt, nihil accipientes a gentilibus.

⁸Nos ergo debemus sublevare huiusmodi, ut cooperatores simus veritatis.

⁹Scripsi aliquid ecclesiae; sed is qui amat primatum gerere in eis, Diotrephes, non recipit nos.

¹⁰Propter hoc, si venero, commonebo eius opera, quae facit verbis malignis garriens in nos; et quasi non ei ista sufficiant, nec ipse suscipit fratres et eos, qui cu piunt, prohibet et de ecclesia eicit.

¹¹Carissime, noli imitari malum, sed quod bonum est. Qui benefacit, ex Deo est; qui malefacit, non vidit Deum.

¹²Demetrio testimonium redditur ab omnibus et ab ipsa veritate; sed et nos testimonium perhibemus, et scis quoniam testimonium nostrum verum est.

¹³Multa habui scribere tibi, sed nolo per atramentum et calamum scribere tibi;

¹⁴spero autem protinus te videre, et os ad os loquemur.

¹⁵Pax tibi. Salutant te amici. Saluta amicos nominatim.