Read Nova_Vulgata Regum I 8 Bible Online

Regum I 8 - Nova_Vulgata bible

Regum I 8

¹Factum est autem cum senuis set, Samuel posuit filios suos iu dices Israel.

²Fuitque nomen filii eius primogeniti Ioel et nomen secundi Abia; iudicabant in Bersabee.

³Et non ambulaverunt filii illius in viis eius, sed declinaverunt post avaritiam acceperuntque munera et perverterunt iudicium.

⁴Congregati ergo universi maiores natu Israel venerunt ad Samuel in Rama

⁵dixeruntque ei: “ Ecce tu senuisti, et filii tui non ambulant in viis tuis; nunc ergo constitue nobis regem, ut iudicet nos, sicut universae habent nationes ”.

⁶Displicuitque sermo in oculis Samuelis, eo quod dixissent: “ Da nobis regem, ut iudicet nos ”. Et oravit Samuel ad Dominum.

⁷Dixit autem Dominus ad Samuel: “ Audi vocem populi in omnibus, quae loquuntur tibi; non enim te abiecerunt, sed me abiecerunt, ne regnem super eos.

⁸Iuxta omnia opera sua, quae fecerunt a die, qua eduxi eos de Aegypto, usque ad diem hanc, sicut dereliquerunt me et servierunt diis alienis, sic faciunt etiam tibi.

⁹Nunc ergo audi vocem eorum; verumtamen contestare eos et praedic eis ius regis, qui regnaturus est super eos ”.

¹⁰Dixit itaque Samuel omnia verba Domini ad populum, qui petierat a se regem,

¹¹et ait: “ Hoc erit ius regis, qui imperaturus est vobis: Filios vestros tollet et ponet in curribus suis facietque sibi equites, et current ante quadrigas eius;

¹²et constituet sibi tribunos et centuriones et aratores agrorum suorum et messores segetum et fabros armorum et curruum suorum.

¹³Filias quoque vestras faciet sibi unguentarias et focarias et panificas.

¹⁴Agros quoque vestros et vineas et oliveta optima tollet et dabit servis suis.

¹⁵Sed et segetes vestras et vinearum reditus addecimabit, ut det eunuchis et famulis suis.

¹⁶Servos etiam vestros et ancillas et boves vestros optimos et asinos auferet et ponet in opere suo.

¹⁷Greges vestros addecimabit, vosque eritis ei servi.

¹⁸Et clamabitis in die illa a facie regis vestri, quem elegistis vobis, et non exaudiet vos Dominus in die illa ”.

¹⁹Noluit autem populus audire vocem Samuel, sed dixerunt: “ Nequaquam: rex enim erit super nos,

²⁰et erimus nos quoque sicut omnes gentes; et iudicabit nos rex noster et egredietur ante nos et pugnabit bella nostra pro nobis ”.

²¹Et audivit Samuel omnia verba populi et locutus est ea in auribus Domini.

²²Dixit autem Dominus ad Samuel: “ Audi vocem eorum et constitue super eos regem ”. Et ait Samuel ad viros Israel: “ Vadat unusquisque in civitatem suam ”.