Read Nova_Vulgata DC Genesis 14 Bible Online

Genesis 14 - Nova_Vulgata DC bible

Genesis 14

¹Factum est autem in illo tempore, ut Amraphel rex Sennaar et Arioch rex Ellasar et Chodorlahomor rex Elam et Thadal rex gentium

²inirent bellum contra Bara regem Sodomae et contra Bersa regem Gomorrae et contra Sennaab regem Adamae et contra Semeber regem Seboim contraque regem Belae; ipsa est Segor.

³Omnes hi convenerunt in vallem Siddim, quae nunc est mare Salis.

⁴Duodecim annis servierant Chodorlahomor et tertio decimo anno recesserunt ab eo.

⁵Igitur anno quarto decimo venit Chodorlahomor et reges, qui erant cum eo, percusseruntque Raphaim in Astharothcarnaim et Zuzim in Ham et Emim in Savecariathaim

⁶et Chorraeos in montibus Seir usque ad Elpharan, quae est in deserto.

⁷Reversique sunt et venerunt ad fontem Mesphat; ipsa est Cades. Et percusserunt omnem regionem Amalecitarum et etiam Amorraeum, qui habitabat in Asasonthamar.

⁸Et egressi sunt rex Sodomae et rex Gomorrae rexque Adamae et rex Seboim necnon et rex Belae, quae est Segor; et direxerunt contra eos aciem in valle Siddim,

⁹scilicet adversus Chodorlahomor regem Elam et Thadal regem gentium et Amraphel regem Sennaar et Arioch regem Ellasar: quattuor reges adversus quinque.

¹⁰Vallis autem Siddim habebat puteos multos bituminis. Itaque rex Sodomae et Gomorrae terga verterunt cecideruntque illuc; et, qui remanserant, fugerunt ad montem.

¹¹Tulerunt autem omnem substantiam Sodomae et Gomorrae et universa, quae ad cibum pertinent, et abierunt;

¹²ceperunt et Lot et substantiam eius, filium fratris Abram, qui habitabat in Sodoma.

¹³Et ecce unus, qui evaserat, nuntiavit Abram Hebraeo, qui habitabat iuxta Quercus Mambre Amorraei fratris Eschol et fratris Aner; hi enim pepigerant foedus cum Abram.

¹⁴Quod cum audisset Abram, captum videlicet Lot fratrem suum, numeravit expeditos vernaculos suos trecentos decem et octo et persecutus est usque Dan;

¹⁵et, divisis sociis, irruit super eos nocte percussitque eos et persecutus est eos usque Hoba, quae est ad laevam Damasci;

¹⁶reduxitque omnem substantiam, necnon et Lot fratrem suum cum substantia illius, mulieres quoque et populum.

¹⁷Egressus est autem rex Sodomae in occursum eius, postquam reversus est a caede Chodorlahomor et regum, qui cum eo erant, in vallem Save, quae est vallis Regis.

¹⁸At vero Melchisedech rex Salem proferens panem et vinum erat enim sacerdos Dei altissimi

¹⁹benedixit ei et ait: Benedictus Abram a Deo excelso, qui creavit caelum et terram

²⁰et benedictus Deus excelsus,qui tradidit hostes tuos in manus tuas".Et dedit ei decimas ex omnibus.

²¹Dixit autem rex Sodomae ad Abram: "Da mihi animas; substantiam tolle tibi".

²²Qui respondit ei: "Levo manum meam ad Dominum, Deum excelsum, creatorem caeli et terrae,

²³a filo subteminis usque ad corrigiam caligae non accipiam ex omnibus, quae tua sunt, ne dicas: "Ego ditavi Abram";

²⁴exceptis his, quae comederunt iuvenes, et partibus virorum, qui venerunt mecum, Aner, Eschol et Mambre: isti accipient partes suas".