Read Nova_Vulgata DC Genesis 25 Bible Online

Genesis 25 - Nova_Vulgata DC bible

Genesis 25

¹Abraham vero aliam duxit uxorem nomine Ceturam,

²quae peperit ei Zamran et Iecsan et Madan et Madian et Iesboc et Sue.

³Iecsan quoque genuit Saba et Dedan. Filii Dedan fuerunt Assurim et Latusim et Loommim.

⁴At vero ex Madian ortus est Epha et Opher et Henoch et Abida et Eldaa. Omnes hi filii Ceturae.

⁵Deditque Abraham cuncta, quae possederat, Isaac;

⁶filiis autem concubinarum suarum largitus est munera et separavit eos ab Isaac filio suo, dum adhuc ipse viveret, ad plagam orientalem.

⁷Fuerunt autem dies vitae Abrahae centum septuaginta quinque anni.

⁸Et deficiens mortuus est Abraham in senectute bona provectaeque aetatis et plenus dierum congregatusque est ad populum suum.

⁹Et sepelierunt eum Isaac et Ismael filii sui in spelunca Machpela, quae sita est in agro Ephron filii Seor Hetthaei e regione Mambre,

¹⁰quem emerat a filiis Heth. Ibi sepultus est ipse et Sara uxor eius.

¹¹Et post obitum illius benedixit Deus Isaac filio eius, qui habitabat iuxta puteum Lahairoi.

¹²Hae sunt generationes Ismael filii Abrahae, quem peperit ei Agar Aegyptia famula Sarae.

¹³Et haec nomina filiorum Ismael in vocabulis et generationibus suis: primogenitus Ismaelis Nabaioth, dein Cedar et Adbeel et Mabsam,

¹⁴Masma quoque et Duma et Massa,

¹⁵Hadad et Thema, Iethur et Naphis et Cedma.

¹⁶Isti sunt filii Ismaelis, et haec nomina eorum per vicos et mansiones eorum: duodecim principes tribuum suarum.

¹⁷Et facti sunt anni vitae Ismaelis centum triginta septem; deficiens mortuus est et appositus ad populum suum.

¹⁸Habitaverunt autem ab Hevila usque Sur, quae respicit Aegyptum introeuntibus Assyriam. In faciem cunctorum fratrum suorum obiit.

¹⁹Hae sunt generationes Isaac filii Abraham: Abraham genuit Isaac;

²⁰qui, cum quadraginta esset annorum, duxit uxorem Rebeccam filiam Bathuelis Aramaei de Paddanaram, sororem Laban Aramaei.

²¹Deprecatusque est Isaac Dominum pro uxore sua, eo quod esset sterilis. Qui exaudivit eum et dedit conceptum Rebeccae.

²²Sed collidebantur in utero eius parvuli. Quae ait: "Si sic est, cur mihi?". Perrexitque, ut consuleret Dominum.

²³Qui respondens ait: Duae gentes sunt in utero tuo,et duo populi ex ventre tuo dividentur;populusque populum superabit,et maior serviet minori".

²⁴Iam tempus pariendi venerat, et ecce gemini in utero eius.

²⁵Qui primus egressus est rufus erat et totus quasi pallium pilosum; vocatumque est nomen eius Esau. Postea frater eius egrediens plantam Esau tenebat manu, et idcirco appellatum est nomen eius Iacob.

²⁶Sexagenarius erat Isaac, quando nati sunt parvuli.

²⁷Quibus adultis, factus est Esau vir gnarus venandi et homo agrestis; Iacob autem vir compositus et habitans in tabernaculis.

²⁸Isaac amabat Esau, eo quod de venationibus illius libenter vesceretur; et Rebecca diligebat Iacob.

²⁹Coxit autem Iacob pulmentum; ad quem, cum venisset Esau de agro lassus,

³⁰ait: "Da mihi de coctione hac rufa, quia oppido lassus sum". Quam ob causam vocatum est nomen eius Edom (id est Rufus).

³¹Cui dixit Iacob: "Vende mihi prius primogenita tua".

³²Ille respondit: "En morior; quid mihi proderunt primogenita?".

³³Ait Iacob: "Iura ergo mihi". Iuravit et vendidit primogenita.

³⁴Et sic, accepto pane et lentis edulio, comedit et bibit; surrexit et abiit parvipendens quod primogenita vendidisset.