Read Nova_Vulgata DC Genesis 35 Bible Online

Genesis 35 - Nova_Vulgata DC bible

Genesis 35

¹Locutus est Deus ad Iacob: "Surge et ascende Bethel et habita ibi; facque altare Deo, qui apparuit tibi, quando fugiebas Esau fratrem tuum".

²Iacob vero, convocata omni domo sua, ait: "Abigite deos alienos, qui in medio vestri sunt, et mundamini ac mutate vestimenta vestra.

³Surgamus et ascendamus in Bethel, ut faciamus ibi altare Deo, qui exaudivit me in die tribulationis meae et socius fuit itineris mei".

⁴Dederunt ergo ei omnes deos alienos, quos habebant, et inaures, quae erant in auribus eorum; at ille infodit ea subter Quercum, quae est prope urbem Sichem.

⁵Cumque profecti essent, terror Dei invasit omnes per circuitum civitates, et non sunt ausi persequi filios Iacob.

⁶Venit igitur Iacob Luzam, quae est in terra Chanaan, id est Bethel, ipse et omnis populus cum eo.

⁷Aedificavitque ibi altare et appellavit nomen loci illius Deus Bethel; ibi enim apparuit ei Deus, cum fugeret fratrem suum.

⁸Eodem tempore mortua est Debora nutrix Rebeccae et sepulta est ad radices Bethel subter quercum; vocatumque est nomen loci illius Quercus fletus.

⁹Apparuit iterum Deus Iacob, postquam reversus est de Paddanaram, benedixitque ei

¹⁰dicens: "Non vocaberis ultra Iacob, sed Israel erit nomen tuum ", et appellavit eum Israel.

¹¹Dixitque ei: "Ego Deus omnipotens. Cresce et multiplicare; gens et congregatio nationum erunt ex te, reges de lumbis tuis egredientur.

¹²Terramque, quam dedi Abraham et Isaac, dabo tibi; et semini tuo post te dabo terram hanc".

¹³Et ascendit ab eo Deus.

¹⁴Ille vero erexit titulum lapideum in loco, quo locutus ei fuerat Deus, libans super eum libamina et effundens oleum

¹⁵vocansque nomen loci illius Bethel.

¹⁶Egressi sunt de Bethel. Et adhuc spatium quoddam erat usque ad Ephratham, cum parturiret Rachel;

¹⁷ob difficultatem partus periclitari coepit, dixitque ei obstetrix: "Noli timere, quia et hac vice habes filium".

¹⁸Egrediente autem anima et imminente iam morte, vocavit nomen filii sui Benoni (id est Filius doloris mei); pater vero appellavit eum Beniamin (id est Filius dextrae).

¹⁹Mortua est ergo Rachel et sepulta est in via, quae ducit Ephratham; haec est Bethlehem.

²⁰Erexitque Iacob titulum super sepulcrum eius; hic est titulus monumenti Rachel usque in praesentem diem.

²¹Egressus inde Israel, fixit tabernaculum trans Magdaleder (id est Turris gregis).

²²Cumque habitaret in illa regione, abiit Ruben et dormivit cum Bilha concubina patris sui; quod illum minime latuit.Erant autem filii Iacob duodecim.

²³Filii Liae: primogenitus Ruben et Simeon et Levi et Iudas et Issachar et Zabulon.

²⁴Filii Rachel: Ioseph et Beniamin.

²⁵Filii Bilhae ancillae Rachelis: Dan et Nephthali.

²⁶Filii Zelphae ancillae Liae: Gad et Aser. Hi sunt filii Iacob, qui nati sunt ei in Paddanaram.

²⁷Venit Iacob ad Isaac patrem suum in Mambre Cariatharbe, id est Hebron, ubi peregrinatus est Abraham et Isaac.

²⁸Et completi sunt dies Isaac centum octoginta annorum;

²⁹consumptusque aetate mortuus est et appositus est populo suo senex et plenus dierum. Et sepelierunt eum Esau et Iacob filii sui.