Read Nova_Vulgata DC Genesis 46 Bible Online

Genesis 46 - Nova_Vulgata DC bible

Genesis 46

¹Profectusque Israel cum omnibus, quae habebat, venit Bersabee et, mactatis ibi victimis Deo patris sui Isaac,

²audivit eum per visionem noctis vocantem se: "Iacob, Iacob!". Cui respondit: "Ecce adsum!".

³Ait illi: "Ego sum Deus, Deus patris tui. Noli timere descendere in Aegyptum, quia in gentem magnam faciam te ibi.

⁴Ego descendam tecum illuc et ego inde adducam te revertentem; Ioseph quoque ponet manus suas super oculos tuos".

⁵Surrexit igitur Iacob a Bersabee, tuleruntque eum filii cum parvulis et uxoribus suis in plaustris, quae miserat pharao ad portandum senem,

⁶sumpserunt quoque omnia, quae possederant in terra Chanaan; veneruntque in Aegyptum Iacob et omne semen eius,

⁷filii eius et nepotes, filiae et cuncta simul progenies.

⁸Haec sunt autem nomina filiorum Israel, qui ingressi sunt in Aegyptum, ipse cum liberis suis.Primogenitus Ruben.

⁹Filii Ruben: Henoch et Phallu et Hesron et Charmi.

¹⁰Filii Simeon: Iamuel et Iamin et Ahod et Iachin et Sohar et Saul filius Chananitidis.

¹¹Filii Levi: Gerson et Caath et Merari.

¹²Filii Iudae: Her et Onan et Sela et Phares et Zara. Mortui sunt autem Her et Onan in terra Chanaan. Natique sunt filii Phares: Esrom et Hamul.

¹³Filii Issachar: Thola et Phua et Iasub et Semron.

¹⁴Filii Zabulon: Sared et Elon et Iahelel.

¹⁵Hi filii Liae, quos genuit in Paddanaram, cum Dina filia sua. Omnes animae filiorum eius et filiarum triginta tres.

¹⁶Filii Gad: Sephon et Haggi, Suni et Esebon, Heri et Arodi et Areli.

¹⁷Filii Aser: Iemna et lesua et Isui et Beria, Sara quoque soror eorum. Filii Beria: Heber et Melchiel.

¹⁸Hi filii Zelphae, quam dedit Laban Liae filiae suae; et hos genuit Iacob: sedecim animas.

¹⁹Filii Rachel uxoris Iacob: Ioseph et Beniamin.

²⁰Natique sunt Ioseph filii in terra Aegypti, quos genuit ei Aseneth filia Putiphare sacerdotis Heliopoleos: Manasses et Ephraim.

²¹Filii Beniamin: Bela et Bochor et Asbel, Gera et Naaman et Echi et Ros, Mophim et Huphim et Ared.

²²Hi filii Rachel, quos genuit Iacob: omnes animae quattuordecim.

²³Filii Dan: Husim.

²⁴Filii Nephthali: Iasiel et Guni et Ieser et Sellem.

²⁵Hi filii Bilhae, quam dedit Laban Racheli filiae suae; et hos genuit Iacob: omnes animae septem.

²⁶Cunctae animae, quae ingressae sunt cum Iacob in Aegyptum et egressae de femore illius, absque uxoribus filiorum eius, sexaginta sex.

²⁷Filii autem Ioseph, qui nati sunt ei in terra Aegypti, animae duae. Omnes animae domus Iacob, quae ingressae sunt in Aegyptum, fuere septuaginta.

²⁸Misit autem Iudam ante se ad Ioseph, ut nuntiaret et occurreret in Gessen.

²⁹Et venerunt in terram Gessen. Iunctoque Ioseph curru suo, ascendit obviam patri suo in Gessen; vidensque eum irruit super collum eius et inter amplexus diu flevit.

³⁰Dixitque Israel ad Ioseph: "Iam laetus moriar, quia vidi faciem tuam et superstitem te relinquo".

³¹Et ille locutus est ad fratres suos et ad omnem domum patris sui: "Ascendam et nuntiabo pharaoni dicamque ei: Fratres mei et domus patris mei, qui erant in terra Chanaan, venerunt ad me.

³²Et sunt viri pastores ovium curamque habent alendorum gregum; pecora sua et armenta et omnia, quae habere potuerunt, adduxerunt secum.

³³Cumque vocaverit vos et dixerit: "Quod est opus vestrum?".

³⁴Respondebitis: "Viri pastores sumus servi tui ab infantia nostra usque in praesens et nos et patres nostri". Haec autem dicetis, ut habitare possitis in terra Gessen, quia detestantur Aegyptii omnes pastores ovium.