Read Nova_Vulgata DC II Samuelis 15 Bible Online

II Samuelis 15 - Nova_Vulgata DC bible

II Samuelis 15

¹Post haec fecit sibi Absalom currus et equos et quinqua ginta viros, qui praecederent eum.

²Et mane consurgens Absalom stabat iuxta viam portae; et omnem virum, qui habebat negotium, ut veniret ad regis iudicium, vocabat Absalom ad se et dicebat: "De qua civitate es tu?". Qui respondens aiebat: "Ex una tribu Israel ego sum servus tuus".

³Respondebatque ei Absalom: "Vide, sermones tui sunt boni et iusti, sed non est qui te audiat constitutus a rege". Dicebatque Absalom:

⁴" Quis me constituat iudicem in terra, ut ad me veniant omnes, qui habent negotium iudicandum, et iustificem eos?".

⁵Sed et cum accederet ad eum homo, ut se prostraret coram illo, extendebat manum suam et apprehendens osculabatur eum.

⁶Faciebatque hoc omni Israel, qui veniebat ad iudicium, ut audiretur a rege, et sollicitabat corda virorum Israel.

⁷Post quattuor autem annos dixit Absalom ad regem: "Vadam, quaeso, et reddam in Hebron vota mea, quae vovi Domino.

⁸Votum enim vovit servus tuus, cum esset in Gesur Syriae, dicens: Si reduxerit me Dominus in Ierusalem, sacrificabo Domino".

⁹Dixitque ei rex. " Vade in pace". Et surrexit et abiit in Hebron.

¹⁰Misit autem Absalom exploratores in universas tribus Israel dicens: "Statim ut audieritis clangorem bucinae, dicite: "Factus est rex Absalom in Hebron".

¹¹Porro cum Absalom ierunt ducenti viri de Ierusalem vocati, euntes simplici corde et causam penitus ignorantes.

¹²Accersivit quoque Absalom, cum immolaret victimas, Achitophel Gilonitem consiliarium David de civitate sua Gilo. Et facta est coniuratio valida; populusque concurrens augebatur cum Absalom.

¹³Venit igitur nuntius ad David dicens: "Toto corde universus Israel sequitur Absalom".

¹⁴Et ait David servis suis, qui erant cum eo in Ierusalem: "Surgite, fugiamus; neque enim erit nobis effugium a facie Absalom. Festinate egredi, ne festinans occupet nos et impellat super nos ruinam et percutiat civitatem in ore gladii".

¹⁵Dixeruntque servi regis ad eum: "In omnibus, quaecumque elegerit dominus noster rex, ecce servi tui sumus".

¹⁶Egressus est ergo rex et universa domus eius post eum et dereliquit rex decem mulieres concubinas ad custodiendam domum.

¹⁷Egressusque rex et omnis populus post eum steterunt ad ultimam domum.

¹⁸Et universi servi eius transierunt iuxta eum; et omnes Cherethi et Phelethi et omnes Getthaei, sescenti viri, qui secuti eum fuerant de Geth, transierunt coram rege.

¹⁹Dixit autem rex ad Ethai Getthaeum: "Cur venis etiam tu nobiscum? Revertere et habita cum rege, quia alienigena es, immo et exsul de loco tuo.

²⁰Heri venisti, et hodie compellam te vagari nobiscum, cum ego vadam, quo iturus sum? Revertere et reduc tecum fratres tuos, et Dominus faciat tecum misericordiam et veritatem".

²¹Et respondit Ethai regi dicens: "Vivit Dominus et vivit dominus meus rex, in quocumque loco fuerit dominus meus rex, sive ad mortem sive ad vitam, ibi erit servus tuus".

²²Et ait David Ethai: "Veni et transi". Et transivit Ethai Getthaeus et omnes viri eius et omnes parvuli, qui cum eo erant.

²³Omnisque terra flebat voce magna, et universus populus transibat. Rex quoque transgrediebatur torrentem Cedron, et cunctus populus incedebat contra viam deserti.

²⁴Venit autem et Sadoc et universi Levitae cum eo portantes arcam foederis Dei; et deposuerunt arcam Dei. Et sacrificavit Abiathar, donec omnis populus egressus fuerat de civitate.

²⁵Et dixit rex ad Sadoc: "Reporta arcam Dei in urbem. Si invenero gratiam in oculis Domini, reducet me et ostendet mihi eam et habitationem suam.

²⁶Si autem dixerit: "Non places mihi", praesto sum: faciat, quod bonum est coram se".

²⁷Et dixit rex ad Sadoc sacerdotem: "Videsne? Revertere in civitatem in pace; et Achimaas filius tuus et Ionathan filius Abiathar, duo filii vestri sint vobiscum.

²⁸Ecce ego morabor ad vada deserti, donec veniat sermo a vobis indicans mihi".

²⁹Reportaverunt igitur Sadoc et Abiathar arcam Dei Ierusalem et manserunt ibi.

³⁰Porro David ascendebat clivum Olivarum scandens et flens, operto capite et nudis pedibus incedens; sed et omnis populus, qui erat cum eo, operto capite ascendebat plorans.

³¹Nuntiatum est autem David quod et Achitophel esset in coniuratione cum Absalom; dixitque David: "Infatua, quaeso, Domine, consilium Achitophel.

³²Cumque ascendisset David summitatem montis, in quo adorabatur Deus, ecce occurrit ei Chusai Arachites, scissa veste et terra pleno capite.

³³Et dixit ei David: "Si veneris mecum, eris mihi oneri;

³⁴Si autem in civitatem revertaris et dixeris Absalom: "Servus tuus ego, rex, ero; servus patris tui ego fui prius, nunc autem ego sum servus tuus", dissipabis mihi consilium Achitophel.

³⁵Habes autem tecum Sadoc et Abiathar sacerdotes; et omne verbum, quodcumque audieris de domo regis, indicabis Sadoc et Abiathar sacerdotibus.

³⁶Sunt autem cum eis duo filii eorum: Achimaas Sadoc et Ionathan Abiathar; et mittetis per eos ad me omne verbum, quod audieritis".

³⁷Veniente ergo Chusai amico David in civitatem, Absalom quoque ingressus est Ierusalem.