Read Nova_Vulgata DC I Regum 12 Bible Online

I Regum 12 - Nova_Vulgata DC bible

I Regum 12

¹Venit autem Roboam in Sichem; illuc enim congregatus erat omnis Israel ad constituendum eum regem.

²At Ieroboam filius Nabat, cum adhuc esset in Aegypto profugus a facie regis Salomonis, audito hoc nuntio, reversus est de Aegypto.

³Miseruntque et vocaverunt eum. Venit ergo Ieroboam et omnis multitudo Israel, et locuti sunt ad Roboam dicentes:

⁴" Pater tuus durissimum iugum imposuit nobis; tu itaque nunc imminue paululum de imperio patris tui durissimo et de iugo gravissimo, quod imposuit nobis, et serviemus tibi".

⁵Qui ait eis: "Ite usque ad tertium diem et revertimini ad me".Cumque abisset populus,

⁶iniit consilium rex Roboam cum senioribus, qui assistebant coram Salomone patre eius, cum adhuc viveret, et ait: "Quod mihi datis consilium, ut respondeam populo huic?".

⁷Qui dixerunt ei: "Si hodie oboedieris populo huic et servieris et petitioni eorum cesseris locutusque fueris ad eos verba lenia, erunt tibi servi cunctis diebus".

⁸Qui dereliquit consilium senum, quod dederant ei, et adhibuit adulescentes, qui nutriti fuerant cum eo et assistebant illi,

⁹dixitque ad eos: "Quod mihi datis consilium, ut respondeam populo huic, qui dixerunt mihi: "Levius fac iugum, quod imposuit pater tuus super nos"?.

¹⁰Et dixerunt ei iuvenes, qui nutriti fuerant cum eo: "Sic loquere populo huic, qui locuti sunt ad te dicentes: "Pater tuus aggravavit iugum nostrum, tu releva nos"; sic loqueris ad eos: Minimus digitus meus grossior est lumbis patris mei.

¹¹Et nunc, pater meus posuit super vos iugum grave, ego autem addam super iugum vestrum; pater meus cecidit vos flagellis, ego autem caedam scorpionibus".

¹²Venit ergo Ieroboam et omnis populus ad Roboam die tertia, sicut locutus fuerat rex dicens: "Revertimini ad me die tertia".

¹³Responditque rex populo dura, derelicto consilio seniorum, quod ei dederant,

¹⁴et locutus est eis secundum consilium iuvenum dicens: Pater meus aggravavit iugum vestrum,ego autem addam iugo vestro;pater meus cecidit vos flagellis,ego autem caedam vos scorpionibus".

¹⁵Ergo non acquievit rex populo, quoniam dispositum erat a Domino, ut suscitaret verbum suum, quod locutus fuerat in manu Ahiae Silonitae ad Ieroboam filium Nabat.

¹⁶Videns itaque omnis Israel quod noluisset eos audire rex, respondit ei dicens: Quae nobis pars in David,vel quae hereditas in filio Isai?Vade in tabernacula tua, Israel!Nunc vide domum tuam, David!". Et abiit Israel in tabernacula sua.

¹⁷Super filios autem Israel, quicumque habitabant in civitatibus Iudae, regnavit Roboam.

¹⁸Misit rex Roboam Adoniram, qui erat super servitutem; et lapidavit eum omnis Israel, et mortuus est. Porro rex Roboam festinus ascendit currum et fugit in Ierusalem.

¹⁹Recessitque Israel a domo David usque in praesentem diem.

²⁰Factum est autem cum audisset omnis Israel quod reversus esset Ieroboam, miserunt et vocaverunt eum, congregato coetu, et constituerunt eum regem super omnem Israel; nec secutus est quisquam domum David praeter tribum Iudae solam.

²¹Venit autem Roboam Ierusalem et congrcgavit universam domum Iudae et tribum Beniamin, centum octoginta milia electorum virorum bellatorum, ut pugnaret contra domum Israel et reduceret regnum Roboam filio Salomonis.

²²Factus est vero sermo Domini ad Semeiam virum Dei dicens:

²³" Loquere ad Roboam filium Salomonis regem Iudae et ad omnem domum Iudae et Beniamin et reliquos de populo dicens:

²⁴Haec dicit Dominus: Non ascendetis neque bellabitis contra fratres vestros, filios Israel; revertatur vir in domum suam; a me enim factum est hoc". Audierunt sermonem Domini et reversi sunt de itinere, sicut eis praeceperat Dominus.

²⁵Aedificavit autem Ieroboam Sichem in monte Ephraim et habitavit ibi; et egressus inde aedificavit Phanuel.

²⁶Dixitque Ieroboam in corde suo: "Nunc revertetur regnum ad domum David,

²⁷si ascenderit populus iste, ut faciat sacrificia in domo Domini in Ierusalem, et convertetur cor populi huius ad dominum suum Roboam regem Iudae, interficientque me et revertentur ad Roboam regem Iudae".

²⁸Et excogitato consilio, fecit rex duos vitulos aureos et dixit ad populum: "Nolite ultra ascendere in Ierusalem! Ecce dii tui, Israel, qui te eduxerunt de terra Aegypti".

²⁹Posuitque unum in Bethel et alterum donavit in Dan;

³⁰et factum est hoc in peccatum: ibat enim populus coram uno usque in Dan.

³¹Et fecit fana in excelsis et sacerdotes de extremis populi, qui non erant de filiis Levi.

³²Constituitque diem sollemnem in mense octavo, quinta decima die mensis, in similitudinem sollemnitatis, quae celebratur in Iuda. Et ascendit altare; sic fecit in Bethel, ut immolaret vitulis, quos fabricatus erat; constituitque in Bethel sacerdotes excelsorum, quae fecerat.

³³Et ascendit super altare, quod exstruxerat in Bethel, quinta decima die mensis octavi, quem finxerat de corde suo; et fecit sollemnitatem filiis Israel et ascendit super altare, ut adoleret.