Read Nova_Vulgata DC I Regum 22 Bible Online

I Regum 22 - Nova_Vulgata DC bible

I Regum 22

¹Transierunt igitur tres anni absque bello inter Syriam et Israel.

²In anno autem tertio descendit Iosaphat rex ludae ad regem Israel,

³dixitque rex Israel ad servos suos: "Ignoratis quod nostra sit Ramoth Galaad et neglegimus tollere eam de manu regis Syriae?".

⁴Et ait ad Iosaphat: "Veniesne mecum ad proeliandum in Ramoth Galaad?".

⁵Dixitque Iosaphat ad regem Israel: "Sicut ego sum, ita et tu; populus meus et populus tuus unum sunt, et equites mei et equites tui". Dixitque Iosaphat ad regem Israel: "Quaere, oro te, hodie sermonem Domini".

⁶Congregavit ergo rex Israel prophetas quadringentos circiter viros et ait ad eos: "Ire debeo in Ramoth Galaad ad bellandum, an quiescere?". Qui responderunt: "Ascende, et dabit Dominus in manu regis".

⁷Dixit autem Iosaphat: "Non est hic et alius propheta Domini, ut interrogemus per eum?".

⁸Et ait rex Israel ad Iosaphat: "Remansit vir unus, per quem possimus interrogare Dominum; sed ego odi eum, quia non prophetat mihi bonum sed malum: Michaeas filius Iemla". Cui Iosaphat ait: "Ne loquaris ita, rex.

⁹Vocavit ergo rex Israel eunuchum quendam et dixit ei: "Festina adducere Michaeam filium Iemla".

¹⁰Rex autem Israel et Iosaphat rex Iudae sedebat unusquisque in solio suo vestiti cultu regio in area iuxta ostium portae Samariae; et universi prophetae prophetabant in conspectu eorum.

¹¹Fecit quoque sibi Sedecias filius Chanaana cornua ferrea et ait: "Haec dicit Dominus: His ventilabis Syriam, donec deleas eam".

¹²Omnesque prophetae similiter prophetabant dicentes: "Ascende in Ramoth Galaad et vade prospere, et tradet Dominus in manu regis".

¹³Nuntius vero, qui ierat ut vocaret Michaeam, locutus est ad eum dicens: Ecce sermones prophetarum ore uno regi bona praedicant; sit ergo sermo tuus similis eorum, et loquere bona".

¹⁴Cui Michaeas ait: "Vivit Dominus quia, quodcumque dixerit mihi Dominus, hoc loquar!".

¹⁵Venit itaque ad regem, et ait illi rex: "Michaea, ire debemus in Ramoth Galaad ad proeliandum, an cessare?". Cui ille respondit: "Ascende et vade prospere, et tradet Dominus in manu regis".

¹⁶Dixit autem rex ad eum: "Iterum atque iterum adiuro te, ut non loquaris mihi, nisi quod verum est in nomine Domini".

¹⁷Et ille ait: Vidi cunctum Israeldispersum in montibusquasi oves non habentes pastorem. Et ait Dominus: "Non habent isti dominum; revertatur unusquisque in domum suam in pace".

¹⁸Dixit ergo rex Israel ad Iosaphat: "Numquid non dixi tibi quia non prophetat mihi bonum sed semper malum?".

¹⁹Ille vero addens ait: "Propterea audi sermonem Domini: Vidi Dominum sedentem super solium suum et omnem exercitum caeli assistentem ei a dextris et a sinistris.

²⁰Et ait Dominus: "Quis decipiet Achab, ut ascendat et cadat in Ramoth Galaad?". Et dixit unus verba huiuscemodi et alius aliter.

²¹Egressus est autem spiritus et stetit coram Domino et ait: "Ego decipiam illum". Cui locutus est Dominus: "In quo?".

²²Et ille ait: "Egrediar et ero spiritus mendax in ore omnium prophetarum eius". Et dixit Dominus: "Decipies et praevalebis; egredere et fac ita".

²³Nunc igitur ecce dedit Dominus spiritum mendacii in ore omnium prophetarum tuorum, qui hic sunt, et Dominus locutus est contra te malum.

²⁴Accessit autem Sedecias filius Chanaana et percussit Michaeam in maxillam et dixit: "Quomodo transivit spiritus Domini a me, ut loqueretur tibi?".

²⁵Et ait Michaeas: "Visurus es in die illa, quando ingredieris cubiculum intra cubiculum, ut abscondaris".

²⁶Et ait rex Israel: "Tolle Michaeam, et maneat apud Amon principem civitatis et apud Ioas filium regis,

²⁷et dic eis: "Haec dicit rex: Mittite virum istum in carcerem et sustentate eum pane tribulationis et aqua angustiae, donec revertar in pace".

²⁸Dixitque Michaeas: "Si reversus fueris in pace, non est locutus Dominus in me". Et ait: "Audite, populi omnes!".

²⁹Ascendit itaque rex Israel et Iosaphat rex Iudae in Ramoth Galaad.

³⁰Dixitque rex Israel ad Iosaphat: "Mutato aspectu ineundum est proelium; tu autem induere vestibus tuis". Porro rex Israel mutavit aspectum et ingressus est bellum.

³¹Rex autem Syriae praeceperat principibus curruum triginta duobus dicens: "Non pugnabitis contra minorem et maiorem quempiam, nisi contra regem Israel solum".

³²Cum ergo vidissent principes curruum Iosaphat, suspicati sunt quod ipse esset rex Israel et impetu facto pugnabant contra eum. Et exclamavit Iosaphat;

³³intellexeruntque principes curruum quod non esset rex Israel et cessaverunt ab eo.

³⁴Vir autem quidam tetendit arcum in incertum sagittam dirigens et percussit regem Israel inter iuncturas et loricam. At ille dixit aurigae suo: "Verte manum tuam et eice me de exercitu, quia graviter vulneratus sum".

³⁵Aggravatum est ergo proelium in die illa; et rex Israel stabat in curru suo contra Syros et mortuus est vespere: fluebat autem sanguis plagae in sinum currus.

³⁶Et clamor insonuit in universo exercitu ad solis occasum: "Unusquisque revertatur in civitatem et in terram suam!".

³⁷Mortuus est igitur rex et perlatus est Samariam; sepelieruntque regem in Samaria.

³⁸Et laverunt currum eius in piscina Samariae; et linxerunt canes sanguinem eius, et scorta laverunt se iuxta verbum Domini, quod locutus fuerat.

³⁹Reliqua vero gestorum Achab et universa, quae fecit, et domus eburnea, quam aedificavit, cunctaeque urbes, quas exstruxit, nonne haec scripta sunt in libro annalium regum Israel?

⁴⁰Dormivit ergo Achab cum patribus suis; et regnavit Ochozias filius eius pro eo.

⁴¹Iosaphat vero filius Asa regnare coeperat super Iudam anno quarto Achab regis Israel;

⁴²triginta quinque annorum erat, cum regnare coepisset, et viginti quinque annos regnavit in Ierusalem. Nomen matris eius Azuba filia Selachi.

⁴³Et ambulavit in omni via Asa patris sui et non declinavit ex ea; fecitque, quod rectum erat in conspectu Domini.

⁴⁴Verumtamen excelsa non abstulit; adhuc enim populus sacrificabat et adolebat in excelsis.

⁴⁵Pacemque fecit Iosaphat cum rege Israel.

⁴⁶Reliqua autem gestorum Iosaphat et opera eius, quae fortiter gessit, et proelia, nonne haec scripta sunt in libro annalium regum Iudae?

⁴⁷Sed et reliquias prostibulorum, qui remanserant in diebus Asa patris eius, abstulit de terra.

⁴⁸Nec erat tunc rex in Edom sed praefectus regius.

⁴⁹Rex vero Iosaphat fecerat naves Tharsis, quae navigarent in Ophir propter aurum; et ire non potuerunt, quia confractae sunt in Asiongaber.

⁵⁰Tunc ait Ochozias filius Achab ad Iosaphat: "Vadant servi mei cum servis tuis in navibus". Et noluit Iosaphat.

⁵¹Dormivitque Iosaphat cum patribus suis et sepultus est cum eis in civitate David patris sui; regnavitque Ioram filius eius pro eo.

⁵²Ochozias autem filius Achab regnare coeperat super Israel in Samaria anno septimo decimo Iosaphat regis Iudae regnavitque super Israel duobus annis.

⁵³Et fecit malum in conspectu Domini et ambulavit in via patris sui et matris suae et in via Ieroboam filii Nabat, qui peccare fecit Israel;

⁵⁴servivit quoque Baal et adoravit eum et irritavit Dominum, Deum Israel, iuxta omnia, quae fecerat pater eius.