Read Nova_Vulgata DC II Regum 10 Bible Online

II Regum 10 - Nova_Vulgata DC bible

II Regum 10

¹Erant autem Achab septuaginta filii in Samaria. Scripsit ergo Iehu litteras et misit in Samariam ad optimates civitatis et ad maiores natu et ad nutricios filiorum Achab dicens:

²" Statim ut acceperitis litteras has, qui habetis filios domini vestri et currus et equos et civitatem firmam et arma,

³eligite meliorem et iustiorem de filiis domini vestri et ponite eum super solium patris sui et pugnate pro domo domini vestri".

⁴Timuerunt illi vehementer et dixerunt: "Ecce duo reges non potuerunt stare coram eo, et quomodo nos valebimus resistere?".

⁵Miserunt ergo praepositus domus et praefectus civitatis et maiores natu et nutricii ad Iehu dicentes: "Servi tui sumus: quaecumque iusseris, faciemus nec constituemus regem; quodcumque tibi placet, fac".

⁶Rescripsit autem eis litteras secundo dicens: "Si mei estis et oboeditis mihi, tollite capita virorum filiorum domini vestri et venite ad me hac eadem hora cras in Iezrahel". Porro filii regis, septuaginta viri, apud optimates civitatis nutriebantur.

⁷Cumque venissent litterae ad eos, tulerunt filios regis et occiderunt septuaginta viros et posuerunt capita eorum in cophinis et miserunt ad eum in Iezrahel.

⁸Venit autem nuntius et indicavit ei dicens: "Attulerunt capita filiorum regis". Qui respondit: "Ponite ea duos acervos iuxta introitum portae usque mane".

⁹Cumque diluxisset, egressus est et stans dixit ad omnem populum: "Vos iusti estis; ecce ego coniuravi contra dominum meum et interfeci eum, sed quis percussit omnes hos?

¹⁰Videte ergo nunc quoniam non cecidit de sermonibus Domini in terram, quos locutus est Dominus super domum Achab, et Dominus fecit, quod locutus est in manu servi sui Eliae".

¹¹Percussit igitur Iehu omnes, qui reliqui erant de domo Achab in Iezrahel, et universos optimates eius et notos et sacerdotes, donec non remanerent ex eo reliquiae.

¹²Et surrexit et intravit. Deinde profectus est in Samariam; cumque esset ad Betheced Pastorum in via,

¹³invenit fratres Ochoziae regis Iudae dixitque ad eos: "Quinam estis vos?". At illi responderunt: "Fratres Ochoziae sumus et descendimus ad salutandos filios regis et filios dominae reginae".

¹⁴Qui ait: "Comprehendite eos vivos". Quos cum comprehendissent vivos, iugulaverunt eos iuxta cisternam Betheced, quadraginta duos viros, et non reliquit ex eis quemquam.

¹⁵Cumque abisset inde, invenit Ionadab filium Rechab in occursum sibi et benedixit ei. Et ait ad eum: "Numquid est cor tuum rectum sicut cor meum cum corde tuo?". Et ait Ionadab: "Est". " Si est, inquit, da manum tuam. Qui dedit manum suam. At ille levavit eum ad se in curru

¹⁶dixitque ad eum: "Veni mecum et vide zelum meum pro Domino". Et impositum currui suo

¹⁷duxit in Samariam. Et percussit omnes, qui reliqui fuerant de Achab in Samaria usque ad unum, iuxta verbum Domini, quod locutus est per Eliam.

¹⁸Congregavit ergo Iehu omnem populum et dixit ad eos: "Achab coluit Baal parum, ego autem colam eum amplius.

¹⁹Nunc igitur omnes prophetas Baal et universos servos eius et cunctos sacerdotes ipsius vocate ad me; nullus sit qui non veniat. Sacrificium enim grande est mihi Baal; quicumque defuerit, non vivet". Porro Iehu faciebat hoc insidiose, ut disperderet cultores Baal.

²⁰Dixitque: "Sanctificate diem sollemnem Baal". Vocaveruntque.

²¹Et misit Iehu in universos terminos Israel, et venerunt cuncti servi Baal; non fuit residuus, ne unus quidem qui non veniret. Et ingressi sunt templum Baal, et repleta est domus Baal a summo usque ad summum.

²²Dixitque ei, qui erat super vestes: "Profer vestimenta universis servis Baal". Et protulit eis vestes.

²³Ingressusque Iehu et Ionadab filius Rechab templum Baal ait cultoribus Baal: "Perquirite et videte, ne quis forte vobiscum sit de servis Domini, sed ut sint soli servi Baal".

²⁴Ingressi sunt igitur, ut facerent victimas et holocausta; Iehu autem praeparaverat sibi foris octoginta viros et dixerat eis: "Quicumque permiserit fugere de hominibus his, quos ego adduxero in manus vestras, anima eius erit pro anima illius".

²⁵Factum est ergo cum completum esset holocaustum, praecepit Iehu cursoribus et ducibus suis: "Ingredimini et percutite eos; nullus evadat!. Percusseruntque eos cursores et duces ore gladii et proiecerunt. Tunc ierunt usque in dabir templi Baal.

²⁶Et protulerunt lapidem Baal et combusserunt

²⁷et comminuerunt eum. Destruxerunt quoque aedem Baal et fecerunt pro ea latrinas usque diem hanc.

²⁸Delevit itaque Iehu Baal de Israel.

²⁹Verumtamen a peccatis Ieroboam filii Nabat, qui peccare fecerat Israel, non recessit; nec dereliquit vitulos aureos, qui erant in Bethel et in Dan.

³⁰Dixit autem Dominus ad Iehu: "Quia studiose fecisti, quod rectum erat in oculis meis et omnia quae erant in corde meo fecisti contra domum Achab, filii tui usque ad quartam generationem sedebunt super thronum Israel".

³¹Porro Iehu non custodivit, ut ambularet in lege Domini, Dei Israel, in toto corde suo; non enim recessit a peccatis Ieroboam, qui peccare fecerat Israel.

³²In diebus illis coepit Dominus discindere in Israel; percussitque eos Hazael in universis finibus Israel

³³a Iordane contra orientalem plagam omnem terram Galaad et Gad et Ruben et Manasse, ab Aroer, quae est super torrentem Arnon, et Galaad et Basan.

³⁴Reliqua autem gestorum Iehu et universa, quae fecit, et fortitudo eius, nonne haec scripta sunt in libro annalium regum Israel?

³⁵Et dormivit Iehu cum patribus suis, sepelieruntque eum in Samaria; et regnavit Ioachaz filius eius pro eo.

³⁶Dies autem, quos regnavit Iehu super Israel, viginti et octo anni sunt, in Samaria.