Read Nova_Vulgata DC II Regum 7 Bible Online

II Regum 7 - Nova_Vulgata DC bible

II Regum 7

¹Dixit autem Eliseus: "Audite verbum Domini. Haec dicit Dominus: In tempore hoc cras modius similae uno statere erit, et duo modii hordei statere uno in porta Samariae".

²Respondens dux, super cuius manum rex incumbebat, homini Dei ait: "Si Dominus fecerit etiam cataractas in caelo, numquid poterit esse, quod loqueris?". Qui ait: "Videbis oculis tuis et inde non comedes".

³Quattuor ergo viri erant leprosi iuxta introitum portae; qui dixerunt ad invicem: "Quid hic esse volumus, donec moriamur?

⁴Sive ingredi voluerimus civitatem, fame moriemur; sive manserimus hic, moriendum nobis est. Venite igitur, et transfugiamus ad castra Syriae. Si pepercerint nobis, vivemus; si autem occidere voluerint, nihilominus moriemur".

⁵Surrexerunt igitur vesperi, ut venirent ad castra Syriae. Cumque venissent ad principium castrorum Syriae, nullum ibidem reppererunt.

⁶Siquidem Dominus sonitum audiri fecerat in castris Syriae curruum et equorum et exercitus plurimi; dixeruntque ad invicem: "Ecce mercede conduxit adversum nos rex Israel reges Hetthaeorum et Aegyptiorum, ut venirent contra nos".

⁷Surrexerunt ergo et fugerunt in tenebris et dereliquerunt tentoria sua et equos et asinos, castra, sicut erant; fugeruntque animas tantum suas salvare cupientes.

⁸Igitur cum venissent leprosi illi ad principium castrorum, ingressi sunt unum tabernaculum et comederunt et biberunt; tuleruntque inde argentum et aurum et vestes et abierunt et absconderunt. Et rursum reversi sunt ad aliud tabernaculum, et inde similiter auferentes absconderunt.

⁹Dixeruntque ad invicem: "Non recte facimus; haec enim dies boni nuntii est, et nos tacemus. Si noluerimus nuntiare usque mane, sceleris arguemur; venite, eamus et nuntiemus in aula regis".

¹⁰Cumque venissent, vocaverunt portarios civitatis et narraverunt eis dicentes: "Ivimus ad castra Syriae et nullum ibidem repperimus hominum nisi equos et asinos alligatos et tentoria, sicut erant".

¹¹Clamaverunt ergo portarii et nuntiaverunt in palatio regis intrinsecus.

¹²Qui surrexit nocte et ait ad servos suos: "Dico vobis quid fecerint nobis Syri. Sciunt quia fame laboramus, et idcirco egressi sunt de castris et latitant in agris dicentes: "Cum egressi fuerint de civitate, capiemus eos viventes, et tunc civitatem ingredi poterimus".

¹³Respondit autem unus servorum eius: "Tollamus quinque equos, qui remanserunt in urbe; fiant sicut universa multitudo Israel, quae consumpta est; mittamus ergo et videamus".

¹⁴Adduxerunt ergo duos currus cum equis, misitque rex post exercitum Syrorum dicens: "Ite et videte".

¹⁵Qui abierunt post eos usque ad Iordanem; ecce autem omnis via plena erat vestibus et vasis, quae proiecerant Syri, cum turbarentur. Reversique nuntii indicaverunt regi.

¹⁶Et egressus populus diripuit castra Syriae; factusque est modius similae statere uno, et duo modii hordei statere uno iuxta verbum Domini.

¹⁷Porro rex ducem illum, in cuius manu incumbebat, constituit ad portam; quem conculcavit turba in introitu, et mortuus est iuxta quod locutus fuerat vir Dei, quando descenderat rex ad eum.

¹⁸Factumque est secundum sermonem viri Dei, quem dixerat regi, quando ait: "Duo modii hordei statere uno erunt, et modius similae statere uno hoc eodem tempore cras in porta Samariae ";

¹⁹quando responderat dux ille viro Dei et dixerat: "Etiamsi Dominus fecerit cataractas in caelo, numquid fieri poterit, quod loqueris? ", et dixerat ei: "Videbis oculis tuis et inde non comedes".

²⁰Evenit ergo ei, sicut praedictum erat, et conculcavit eum populus in porta, et mortuus est.