Read Nova_Vulgata DC I Paralipomenon 10 Bible Online

I Paralipomenon 10 - Nova_Vulgata DC bible

I Paralipomenon 10

¹Philisthim autem pugnabant contra Israel, fugeruntque viri Israel a facie Philisthim et ceciderunt vulnerati in monte Gelboe;

²cumque appropinquassent Philisthaei persequentes Saul et filios eius, percusserunt Ionathan et Abinadab et Melchisua filios Saul.

³Et aggravatum est proelium contra Saul, inveneruntque eum sagittarii et vulneraverunt iaculis;

⁴et dixit Saul ad armigerum suum: "Evagina gladium tuum et interfice me, ne forte veniant incircumcisi isti et illudant mihi". Noluit autem armiger eius hoc facere timore perterritus. Arripuit igitur Saul ensem et irruit in eum;

⁵quod cum vidisset armiger eius, videlicet mortuum esse Saul, irruit etiam ipse in gladium suum et mortuus est.

⁶Interiit ergo Saul et tres filii eius; omnis domus illius pariter concidit.

⁷Quod cum vidissent omnes viri Israel, qui habitabant in campestribus, quod fugissent, et mortui essent Saul et filii eius, dereliquerunt urbes suas et huc illucque dispersi sunt; veneruntque Philisthim et habitaverunt in eis.

⁸Die igitur altero venerunt Philisthim, ut spoliarent interfectos, et invenerunt Saul et filios eius iacentes in monte Gelboe;

⁹cumque spoliassent eum et amputassent caput armisque nudassent, miserunt in terram suam per circuitum, ut annuntiaretur in idolorum templis et in populis.

¹⁰Arma autem eius consecraverunt in fano Astharoth et caput affixerunt in templo Dagon.

¹¹Hoc cum audissent viri Iabes Galaad, omnia scilicet quae Philisthim fecerunt super Saul,

¹²consurrexerunt omnes viri fortes et tulerunt cadavera Saul et filiorum eius attuleruntque ea in Iabes et sepelierunt ossa eorum subter quercum, quae erat in Iabes, et ieiunaverunt septem diebus.

¹³Mortuus est ergo Saul propter iniquitatem suam, eo quod praevaricatus sit mandatum Domini, quod praeceperat, et non custodierit illud, sed insuper etiam pythonissam consuluerit

¹⁴nec quaesierit Dominum; propter quod et interfecit eum et transtulit regnum eius ad David filium Isai.