Read Nova_Vulgata DC I Paralipomenon 13 Bible Online

I Paralipomenon 13 - Nova_Vulgata DC bible

I Paralipomenon 13

¹Iniit autem consilium David cum tribunis et centurionibus et universis principibus

²et ait ad omnem coetum Israel: "Si placet vobis, et a Domino Deo nostro egreditur sermo, quem loquor, mittamus ad fratres nostros reliquos in universas regiones Israel et ad sacerdotes et Levitas, qui habitant in suburbanis urbium, ut congregentur ad nos,

³et reducamus arcam Dei nostri ad nos; non enim requisivimus eam in diebus Saul".

⁴Et respondit universa multitudo, ut ita fieret; placuerat enim sermo omni populo.

⁵Congregavit ergo David cunctum Israel a Sihor Aegypti usque ad introitum dum ingrediaris Emath, ut adduceret arcam Dei de Cariathiarim.

⁶Et ascendit David et omnis Israel in Baala, in Cariathiarim, quae est in Iuda, ut afferrent inde arcam Dei Domini sedentis super cherubim, ubi invocatum est nomen eius.

⁷Imposueruntque arcam Dei super plaustrum novum de domo Abinadab. Oza autem et Ahio minabant plaustrum.

⁸Porro David et universus Israel ludebant coram Deo omni virtute in canticis et in citharis et psalteriis et tympanis et cymbalis et tubis.

⁹Cum autem pervenissent ad aream Chidon, tetendit Oza manum suam, ut sustentaret arcam; boves quippe lascivientes proruperunt.

¹⁰Iratus est itaque Dominus contra Ozam et percussit eum, eo quod contigisset arcam; et mortuus est ibi coram Deo.

¹¹Contristatusque est David, eo quod dirupisset Dominus Ozam; et vocatus est locus ille Pharesoza (id est Diruptio Ozae) usque in praesentem diem.

¹²Et timuit Deum tunc temporis dicens: "Quomodo possum ad me introducere arcam Dei?".

¹³Et ob hanc causam non eam adduxit ad se, hoc est in civitatem David, sed avertit in domum Obededom Getthaei.

¹⁴Mansit ergo arca Dei apud domum Obededom tribus mensibus; et benedixit Dominus domui eius et omnibus quae habebat.