Read Nova_Vulgata DC I Paralipomenon 16 Bible Online

I Paralipomenon 16 - Nova_Vulgata DC bible

I Paralipomenon 16

¹Attulerunt igitur arcam Dei et constituerunt eam in me dio tabernaculi, quod tetenderat ei David, et obtulerunt holocausta et pacifica coram Deo.

²Cumque complesset David offerens holocausta et pacifica, benedixit populo in nomine Domini.

³Et divisit unicuique de Israel a viro usque ad mulierem tortam panis et laganum palmarum et palatham.

⁴Constituitque coram arca Domini de Levitis ministros, qui recordarentur operum eius et glorificarent atque laudarent Dominum, Deum Israel:

⁵Asaph principem et secundum eius Zachariam, porro Iehiel et Semiramoth et Iahiel et Matthathiam et Eliab et Banaiam et Obededom et Iehiel in organis psalterii et citharis, Asaph autem, ut cymbalis personaret,

⁶Banaiam vero et Iahaziel sacerdotes, ut canerent tubis iugiter coram arca foederis Dei.

⁷In illo die, tunc fecit David prima vice confiteri Domino per manum Asaph et fratrum eius:

⁸" Confitemini Domino, invocate nomen eius,notas facite in populis opera eius.

⁹Canite ei et psalliteet narrate omnia mirabilia eius.

¹⁰Laudate nomen sanctum eius,laetetur cor quaerentium Dominum.

¹¹Quaerite Dominum et virtutem eius,quaerite faciem eius semper.

¹²Recordamini mirabilium eius, quae fecit,signorum illius et iudiciorum oris eius,

¹³semen Israel, servi eius,filii Iacob, electi illius.

¹⁴Ipse Dominus Deus noster;in universa terra iudicia eius.

¹⁵Recordamini in sempiternum pacti eius,sermonis, quem praecepit in mille generationes,

¹⁶pacti, quod pepigit cum Abraham,et iuramenti illius cum Isaac.

¹⁷Et constituit illud Iacob in praeceptumet Israel in pactum sempiternum

¹⁸dicens: "Tibi dabo terram Chanaanfuniculum hereditatis vestrae",

¹⁹cum essent pauci numero,parvi et coloni in ea.

²⁰Et transierunt de gente in gentemet de regno ad populum alterum;

²¹non dimisit quemquam calumniari eos,sed increpuit pro eis reges:

²²"Nolite tangere christos meoset in prophetis meis nolite malignari".

²³Canite Domino, omnis terra,annuntiate ex die in diem salutare eius.

²⁴Narrate in gentibus gloriam eius,in cunctis populis mirabilia illius.

²⁵Quia magnus Dominus et laudabilis nimiset horribilis super omnes deos;

²⁶omnes enim dii populorum inania,Dominus autem caelos fecit.

²⁷Magnificentia et pulchritudo coram eo,fortitudo et gaudium in loco eius.

²⁸Afferte Domino, familiae populorumafferte Domino gloriam et imperium;

²⁹date Domino gloriam nominis eius,levate oblationem et venite in conspectu eiuset adorate Dominum in decore sancto.

³⁰Commoveatur a facie illius omnis terra;ipse enim fundavit orbem immobilem.

³¹Laetentur caeli, et exsultet terra,et dicant in nationibus: "Dominus regnat!".

³²Tonet mare et plenitudo eius,exsultent agri et omnia, quae in eis sunt.

³³Tunc laudabunt ligna saltus coram Domino,quia venit iudicare terram.

³⁴Confitemini Domino, quoniam bonus,quoniam in aeternum misericordia eius.

³⁵Et dicite: "Salva nos, Deus salvator noster,et congrega nos et erue de gentibus, ut confiteamur nomini sancto tuoet exsultemus in carminibus tuis.

³⁶Benedictus Dominus, Deus Israel,ab aeterno usque in aeternum".Et dixit omnis populus: "Amen! " et " Laus Domino!".

³⁷Dereliquit itaque ibi coram arca foederis Domini Asaph et fratres eius, ut ministrarent in conspectu arcae iugiter secundum ritum singulorum dierum.

³⁸Porro Obededom et fratres eius sexaginta octo et Obededom filium Idithun et Hosa constituit ianitores.

³⁹Sadoc autem sacerdotem et fratres illius sacerdotes coram habitaculo Domini in excelso, quod erat in Gabaon,

⁴⁰ut offerrent holocausta Domino super altare holocautomatis iugiter, mane et vespere, iuxta omnia, quae scripta sunt in lege Domini, quam praecepit Israeli.

⁴¹Et cum eis Heman et Idithun et reliquos electos, qui nominatim memorati sunt ad confitendum Domino: "Quoniam in aeternum misericordia eius".

⁴²Et cum eis Heman et Idithun canentes tuba et quatientes cymbala bene sonantia et omnia musicorum organa ad canendum Deo; filios autem Idithun fecit esse portarios.

⁴³Reversusque est omnis populus unusquisque in domum suam et David, ut benediceret etiam domui suae.