Read Nova_Vulgata DC I Paralipomenon 5 Bible Online

I Paralipomenon 5 - Nova_Vulgata DC bible

I Paralipomenon 5

¹Filii quoque Ruben primogeniti Israel: ipse quippe fuit primoge nitus eius, sed, cum violasset torum patris sui, data sunt primogenita eius filiis Ioseph filii Israel, ut non computaretur in primogenitum,

²quia Iuda erat quidem fortissimus inter fratres suos et de stirpe eius principes germinati sunt, primogenita autem reputata sunt Ioseph.

³Filii ergo Ruben primogeniti Israel: Henoch et Phallu, Hesron et Charmi.

⁴Filii Ioel: Semeia filius eius, Gog filius eius, Semei filius eius,

⁵Micha filius eius, Reaia filius eius, Baal filius eius,

⁶Beera filius eius, quem captivum duxit Theglathphalasar rex Assyriorum, et fuit princeps in tribu Ruben.

⁷Fratres autem eius in cognationibus eius, quando numerabantur in genealogiis suis, erant: caput Iehiel, deinde Zacharias;

⁸porro Bela filius Azaz filii Samma filii Ioel, ipse habitavit in Aroer usque ad Nabo et Baalmeon.

⁹Contra orientalem quoque plagam habitavit usque ad introitum eremi, quae est inde a flumine Euphrate; multum quippe gregum eorum numerus creverat in terra Galaad.

¹⁰In diebus autem Saul proeliati sunt contra Agarenos et interfecerunt illos; habitaveruntque pro eis in tabernaculis eorum in omni plaga, quae respicit ad orientem Galaad.

¹¹Filii vero Gad e regione eorum habitaverunt in terra Basan usque Salcha:

¹²Ioel in capite et Sapham secundus, porro Ianai et Saphat in Basan;

¹³fratres vero eorum secundum familias suas: Michael et Mosollam et Seba et Iorai et Iachan et Zie et Heber, septem.

¹⁴Hi filii Abihail filii Huri filii Iaroe filii Galaad filii Michael filii Iesesi filii Ieddo filii Buz.

¹⁵Ahi filius Abdiel filii Guni princeps familiarum eorum.

¹⁶Et habitaverunt in Galaad et in Basan et in viculis eius et in cunctis suburbanis Saron usque ad terminos.

¹⁷Omnes hi numerati sunt in diebus Ioatham regis Iudae et in diebus Ieroboam regis Israel.

¹⁸Filii Ruben et Gad et dimidiae tribus Manasse viri bellatores scuta portantes et gladios et tendentes arcum eruditique ad proelia, quadraginta quattuor milia et septingenti sexaginta procedentes ad pugnam;

¹⁹dimicaverunt contra Agarenos et Ituraeos et Naphisaeos et Nodabaeos.

²⁰Et datum est eis auxilium, traditique sunt in manus eorum Agareni et universi, qui fuerant cum eis, quia Deum invocaverunt cum proeliarentur, et exaudivit eos, eo quod credidissent in eum.

²¹Ceperuntque omnia, quae possederant, camelorum quinquaginta milia et ovium ducenta quinquaginta milia, asinos duo milia et animas hominum centum milia;

²²vulnerati autem multi corruerunt; fuit enim bellum Domini. Habitaveruntque pro eis usque ad transmigrationem.

²³Filii quoque dimidiae tribus Manasse possederunt terram a Basan usque Baalhermon et Sanir et montem Hermon; ingens quippe numerus erat.

²⁴Et hi fuerunt principes familiarum eorum: Epher et Iesi et Eliel et Azriel et Ieremia et Odovia et Iediel; viri bellatores fortissimi et nominati, duces in familiis suis.

²⁵Reliquerunt autem Deum patrum suorum et fornicati sunt post deos populorum terrae, quos abstulit Deus coram eis.

²⁶Et suscitavit Deus Israel spiritum Phul regis Assyriorum et spiritum Theglathphalasar regis Assur; et transtulit Ruben et Gad et dimidium tribus Manasse et adduxit eos in Hala et Habor et Ara et fluvium Gozan usque ad diem hanc.

²⁷Filii Levi: Gerson, Caath, Merari.

²⁸Filii Caath: Amram, Isaar, Hebron et Oziel.

²⁹Filii Amram: Aaron, Moyses et Maria. Filii Aaron: Nadab et Abiu, Eleazar et Ithamar.

³⁰Eleazar genuit Phinees, et Phinees genuit Abisue;

³¹Abisue vero genuit Bocci, et Bocci genuit Ozi.

³²Ozi genuit Zaraiam, et Zaraias genuit Meraioth,

³³porro Meraioth genuit Amariam, et Amarias genuit Achitob;

³⁴Achitob genuit Sadoc, Sadoc genuit Achimaas,

³⁵Achimaas genuit Azariam, Azarias genuit Iohanan;

³⁶Iohanan genuit Azariam: ipse est qui sacerdotio functus est in domo, quam aedificavit Salomon in Ierusalem.

³⁷Genuit autem Azarias Amariam, et Amarias genuit Achitob,

³⁸Achitob genuit Sadoc, et Sadoc genuit Sellum;

³⁹Sellum genuit Helciam, et Helcias genuit Azariam.

⁴⁰Azarias genuit Saraiam, et Saraias genuit Iosedec;

⁴¹porro Iosedec egressus est, quando transtulit Dominus Iudam et Ierusalem per manus Nabuchodonosor.