Read Nova_Vulgata DC II Paralipomenon 15 Bible Online

II Paralipomenon 15 - Nova_Vulgata DC bible

II Paralipomenon 15

¹Azarias autem filius Oded, facto in se spiritu Dei,

²egressus est in occursum Asa et dixit ei: "Audite me, Asa et omnis Iuda et Beniamin! Dominus vobiscum, quia fuistis cum eo. Si quaesieritis eum, invenietur a vobis; si autem dereliqueritis eum, derelinquet vos.

³Transierunt autem multi dies in Israel absque Deo veritatis et absque sacerdote doctore et absque lege.

⁴Cumque reversi essent in angustia sua ad Dominum, Deum Israel, et quaesivissent eum, inventus est ab eis.

⁵In temporibus illis non erat pax egredienti et ingredienti sed perturbatio magna multa in cunctis habitatoribus terrarum;

⁶contundebatur enim gens contra gentem, et civitas contra civitatem, quia Dominus conturbabat eos in omni angustia.

⁷Vos autem confortamini, et non dissolvantur manus vestrae; erit enim merces operi vestro".

⁸Cum audisset Asa verba haec et prophetiam, confortatus est et abstulit idola de omni terra Iudae et Beniamin et ex urbibus, quas ceperat montis Ephraim, et dedicavit altare Domini, quod erat ante porticum Domini.

⁹Congregavitque universum Iudam et Beniamin et advenas cum eis de Ephraim et de Manasse et de Simeon; plures enim ad eum confugerant ex Israel videntes quod Dominus Deus illius esset cum eo.

¹⁰Cumque convenissent in Ierusalem mense tertio anno quinto decimo regni Asa,

¹¹immolaverunt Domino in die illa de manubiis, quas adduxerant: boves septingentos et oves septem milia.

¹²Et inierunt foedus, ut quaererent Dominum, Deum patrum suorum, in toto corde et in tota anima sua:

¹³si quis autem non quaesierit Dominum, Deum Israel, moriatur a minimo usque ad maximum, a viro usque ad mulierem.

¹⁴Iuraveruntque Domino voce magna in iubilo et in clangore tubarum et in sonitu bucinarum.

¹⁵Omnes, qui erant in Iuda, gavisi sunt de iuramento; in omni enim corde suo iuraverant et in tota voluntate quaesierant eum, et inventus fuerat ab eis. Praestititque eis Dominus requiem per circuitum.

¹⁶Sed et Maacham matrem Asa rex amovit, ne esset domina, eo quod fecisset simulacrum Aserae; quod contrivit Asa et in frusta comminuens combussit in torrente Cedron.

¹⁷Excelsa autem derelicta sunt in Israel; attamen cor Asa erat perfectum cunctis diebus eius.

¹⁸Ea quae voverat pater suus et ipse, intulit in domum Dei, argentum et aurum vasorumque diversam supellectilem.

¹⁹Bellum vero non fuit usque ad tricesimum quintum annum regni Asa.