Read Nova_Vulgata DC II Paralipomenon 4 Bible Online

II Paralipomenon 4 - Nova_Vulgata DC bible

II Paralipomenon 4

¹Fecit quoque altare aeneum viginti cubitorum longitudinis et viginti cubitorum latitudinis et decem cubitorum

²altitudinis. Mare etiam fusile decem cubitis a labio usque ad labium rotundum per circuitum; quinque cubitos habebat altitudinis, et funiculus triginta cubitorum ambiebat gyrum eius.

³Similitudo quoque boum erat subter illud, in circuitu circumdabant illud decem cubitis - duobus versibus alvum maris circuibant boves fusiles in una fusione cum mari.

⁴Et ipsum mare super duodecim boves impositum erat, quorum tres respiciebant aquilonem et alii tres occidentem, porro tres alii meridiem et tres, qui reliqui erant, orientem habentes mare superpositum; posteriora autem boum erant intrinsecus sub mari.

⁵Porro vastitas eius habebat mensuram palmi, et labium illius erat quasi labium calicis vel repandi lilii; capiebatque tria milia batos.

⁶Fecit quoque luteres decem et posuit quinque a dextris et quinque a sinistris, ut lavarent in eis omnia, quae in holocaustum oblaturi erant; porro in mari sacerdotes lavabantur.

⁷Fecit autem et candelabra aurea decem secundum speciem, qua iussa erant fieri, et posuit ea in templo quinque a dextris et quinque a sinistris.

⁸Necnon et mensas decem, et posuit eas in templo quinque a dextris et quinque a sinistris; phialas quoque aureas centum.

⁹Fecit etiam atrium sacerdotum et atrium grande et ostia in atrio, quae texit aere.

¹⁰Porro mare posuit in latere dextro contra orientem ad meridiem.

¹¹Fecit autem Hiram lebetes et vatilla et phialas et complevit omne opus regis Salomonis in domo Dei;

¹²hoc est columnas duas et globos et capitella super caput columnarum duarum et serta duo, quae tegerent globos capitellorum;

¹³malogranata quoque quadringenta et serta duo, ita ut bini ordines malogranatorum singulis sertis iungerentur, quae protegerent globos capitellorum columnarum.

¹⁴Bases etiam fecit et luteres, quos superposuit basibus,

¹⁵mare unum, boves quoque duodecim sub mari;

¹⁶et lebetes et vatilla et fuscinulas: omnia vasa fecit regi Salomoni Hiram magister eius pro domo Domini ex aere mundissimo.

¹⁷In regione Iordanis fudit ea rex in argillosa terra inter Succoth et Saredatha.

¹⁸Fecitque Salomon multitudinem vasorum innumerabilem, ita ut ignoraretur pondus aeris.

¹⁹Fecitque Salomon omnia vasa domus Dei et altare aureum et mensas et super eas panes propositionis;

²⁰candelabra quoque cum lucernis suis, ut lucerent ante Dabir iuxta ritum, ex auro purissimo,

²¹et florem et lucernas et forcipes aureos: omnia de auro perfectissimo facta sunt;

²²cultros quoque et phialas et sartagines et turibula ex auro purissimo. Et ostia templi interiora in sancta sanctorum et ostia templi forinsecus aurea.