Read Nova_Vulgata DC Exodus 18 Bible Online

Exodus 18 - Nova_Vulgata DC bible

Exodus 18

¹Cumque audisset Iethro sacerdos Madian socer Moysi omnia, quae fecerat Deus Moysi et Israel populo suo, eo quod eduxisset Dominus Israel de Aegypto,

²tulit Sephoram uxorem Moysi, quam remiserat,

³et duos filios eius, quorum unus vocabatur Gersam, dicente patre: "Advena fui in terra aliena ",

⁴alter vero Eliezer: "Deus enim, ait, patris mei adiutor meus, et eruit me de gladio pharaonis".

⁵Venit ergo Iethro socer Moysi et filii eius et uxor eius ad Moysen in desertum, ubi erat castrametatus iuxta montem Dei;

⁶et mandavit Moysi dicens: "Ego socer tuus Iethro venio ad te et uxor tua et duo filii tui cum ea".

⁷Qui egressus in occursum soceri sui adoravit et osculatus est eum, salutaveruntque se mutuo verbis pacificis. Cumque intrasset tabernaculum,

⁸narravit Moyses socero suo cuncta, quae fecerat Dominus pharaoni et Aegyptiis propter Israel, universumque laborem, qui accidisset eis in itinere, et quod liberaverat eos Dominus.

⁹Laetatusque est Iethro super omnibus bonis, quae fecerat Dominus Israel, eo quod eruisset eum de manu Aegyptiorum,

¹⁰et ait: "Benedictus Dominus, qui liberavit vos de manu Aegyptiorum et de manu pharaonis.

¹¹Nunc cognovi quia magnus Dominus super omnes deos, eo quod eruerit populum de manu Aegyptiorum, qui superbe egerunt contra illos".

¹²Obtulit ergo Iethro socer Moysi holocausta et hostias Deo; veneruntque Aaron et omnes seniores Israel, ut comederent panem cum eo coram Deo.

¹³Altero autem die sedit Moyses, ut iudicaret populum, qui assistebat Moysi de mane usque ad vesperam.

¹⁴Quod cum vidisset socer eius, omnia scilicet, quae agebat in populo, ait: "Quid est hoc, quod facis in plebe? Cur solus sedes, et omnis populus praestolatur de mane usque ad vesperam?".

¹⁵Cui respondit Moyses: "Venit ad me populus quaerens sententiam Dei.

¹⁶Cumque acciderit eis aliqua disceptatio, veniunt ad me, ut iudicem inter eos et ostendam praecepta Dei et leges eius".

¹⁷At ille: "Non bonam, inquit, rem facis.

¹⁸Consumeris et tu et populus iste, qui tecum est. Ultra vires tuas est negotium; solus illud non poteris sustinere.

¹⁹Sed audi verba mea atque consilia, et erit Deus tecum: Esto tu populo in his, quae ad Deum pertinent, ut referas causas ad Deum

²⁰ostendasque populo praecepta et leges viamque, per quam ingredi debeant, et opus, quod facere debeant.

²¹Provide autem de omni plebe viros strenuos et timentes Deum, in quibus sit veritas, et qui oderint avaritiam, et constitue ex eis tribunos et centuriones et quinquagenarios et decanos,

²²qui iudicent populum omni tempore. Quidquid autem maius fuerit, referant ad te, et ipsi minora tantummodo iudicent; leviusque sit tibi, partito cum aliis onere.

²³Si hoc feceris, implebis imperium Dei et praecepta eius poteris sustentare, et omnis hic populus revertetur ad loca sua cum pace".

²⁴Quibus auditis, Moyses fecit omnia, quae ille suggesserat;

²⁵et, electis viris strenuis de cuncto Israel, constituit eos principes populi, tribunos et centuriones et quinquagenarios et decanos,

²⁶qui iudicabant plebem omni tempore. Quidquid autem gravius erat, referebant ad eum, faciliora tantummodo iudicantes.

²⁷Dimisitque socerum suum, qui reversus abiit in terram suam.