Read Nova_Vulgata DC Exodus 24 Bible Online

Exodus 24 - Nova_Vulgata DC bible

Exodus 24

¹Moysi quoque dixit: "Ascende ad Dominum, tu et Aa ron, Nadab et Abiu et septuaginta senes ex Israel, et adorabitis procul.

²Solusque Moyses ascendet ad Dominum, et illi non appropinquabunt, nec populus ascendet cum eo".

³Venit ergo Moyses et narravit plebi omnia verba Domini atque iudicia; responditque omnis populus una voce: "Omnia verba Domini, quae locutus est, faciemus".

⁴Scripsit autem Moyses universos sermones Domini; et mane consurgens aedificavit altare ad radices montis et duodecim lapides per duodecim tribus Israel.

⁵Misitque iuvenes de filiis Israel, et obtulerunt holocausta; immolaveruntque victimas pacificas Domino vitulos.

⁶Tulit itaque Moyses dimidiam partem sanguinis et misit in crateras; partem autem residuam respersit super altare.

⁷Assumensque volumen foederis legit, audiente populo, qui dixerunt: "Omnia, quae locutus est Dominus, faciemus et erimus oboedientes".

⁸Ille vero sumptum sanguinem respersit in populum et ait: "Hic est sanguis foederis, quod pepigit Dominus vobiscum super cunctis sermonibus his".

⁹Ascenderuntque Moyses et Aaron, Nadab et Abiu et septuaginta de senioribus Israel.

¹⁰Et viderunt Deum Israel, et sub pedibus eius quasi opus lapidis sapphirini et quasi ipsum caelum, cum serenum est.

¹¹Nec in electos filiorum Israel misit manum suam; videruntque Deum et comederunt ac biberunt.

¹²Dixit autem Dominus ad Moysen: "Ascende ad me in montem et esto ibi; daboque tibi tabulas lapideas et legem ac mandata, quae scripsi, ut doceas eos".

¹³Surrexerunt Moyses et Iosue minister eius; ascendensque Moyses in montem Dei

¹⁴senioribus ait: "Exspectate hic, donec revertamur ad vos. Habetis Aaron et Hur vobiscum; si quid natum fuerit quaestionis, referetis ad eos".

¹⁵Cumque ascendisset Moyses in montem, operuit nubes montem;

¹⁶et habitavit gloria Domini super Sinai tegens illum nube sex diebus; septimo autem die vocavit eum de medio caliginis.

¹⁷Erat autem species gloriae Domini quasi ignis ardens super verticem montis in conspectu filiorum Israel.

¹⁸Ingressusque Moyses medium nebulae ascendit in montem; et fuit ibi quadraginta diebus et quadraginta noctibus.